Say Manangasikaso na Liwawa tan Bilay

Inagew-agew, kabangon tayo, amta tayo ya no onlimata tayo, tampol ya naneng-neng tayo so kaliber-liber tayo. Agtayo la asasikasoen ta parte laya na bilay tayo. Say pakanengneng tayo lapud say mata ya walad sikatayo et sakey labat tan ya regalao para sikatayo. Sayan regalo ed nanlapud Dios. Inter ya Dios ya ed sikatayo – mabolos ya inter, anggapoy bayar, anggapoy kasalat. Kanian, saya et tatawagen ya regalo!

Amtak asali yo la so manakar-akar ed gilig na dayat tayo diad San Fabian. Sakey ed saray sankarakepan ya beaches ed interon bansa tayo. Laut la no manakar kayo no kabkabwasan odino no mansironget la. Nanengneng yo so sankarakepan ya sunrise o sunset. Onlokso so puso. Tan makaliliket kayo. Saman ya marekep ya secenery, anggapoy bayar to iman. Agtayo babayaran na anggan anton kantidad so Katawan pian naneneng tayo so sunset, saray kolor na rainbow. Anggapo so ticket ya kekerewen na Dios ed sikayo pian nanengneng yo so lupa na naka yo, apo yo, tan say kagangana na asawa yo odino say kumanet na lupay masiken yo. Amin ya naneneng-neng na mata tayo et regalo na Dios. Anggaman say mata na pananisia, regalo na Dios.

Say pananisia ya mangibabangat ed sikayo ya sanaagi tayo lapud sikatayo so nagmaliw ya anak na Dios. Amta na Dios ingen ya diad ag mabayag, sikayo so mabetbet ya mankasalanan ed Sikara. Balet, anggaman ontan, bibirbiren itayo na Dios ya anak Da ni. Agayla so Dios! Masyado yan Dios tayo! Akin et onya? Duma so pakanengneng na Dios ed sikayo; tan duma so panagnengneng tayo ran totoo ed Dios tayo.

Nen abinyagan tayo, inawat tayo so kandila. Sayan kandila et sinelselan. Saya et simbolo na “liwawa nen Kristo”. Diad panamegley na sayan binyag, sikatayo so nagmaliw ya anak na liwawa. Tan sirin, nepeg labat ya sikatayo so manbibilay a walad liwawa – aliwan diad kabilongetan na kaugsan, say kabilongetan na takot, odino kabilongetan na agom, imon tan bosol.

Say silew nen Kristo et regalo na Dios met ed sikatayo. Saya et asikasoen. Aliwan para sikatayo labat yan silew. Say liwawa a manlalapud sayan silew na pananisia so nepeg ya ipikabiangan tayo ed arum. Ed sarayan panaon, nakaukoklan iray teachers – saray managbangat. Managbangat na liwawa. Sarag tayon manbangat lapud diad balang dili tayo,  walay liwawa nen Kristo ya mandarlang. Tan si Kristo so nepeg ya isinag na sayan liwawa ya walad sikayo.

Say katekista et say ibabangat to ed si Kristo. Say katekista so toon nabet to si Kristo, kabat to si Kristo, inaro to si Kristo tan aaroen to si Kristo diad pangaro tod arum. No say liwawa nen Kristo ya walad sikatayo et onsisinag ed arum lapud say pan-istorya tayo nipaakar ed say panangaro nen Kristo, saray kimey nen Kristo ed bilay tayo, no panon ya inaro tan kakasian itayo nen Kristo, tan saya et ibabangat tayo ed saray anak, apo, asawa, kakaaro – sikatayo so katekista na Katawan. Aasikasoen tayo so liwawa ya inregalo na Dios ed sikatayo.

Naawat tayon sakey ya regalo, inter tayon anggapoy saew ed arum so sayan liwawa. Ipawil ya mabolbolos ed Dios ya mandarlang iyan silew. Onya so twan kabaliksan na say steward na Dios. Say manangasikaso na Dios – say manangasikaso na liwawa tan bilay. No manbolag-bolagan, tan manelek-telekan tayo ed saray akis tan pankaukolan na saray anak yo tan saray walad kairapan na bilay, sikatayo so husgaan na Dios ya anggapoy kakanaan ya manangasikaso to.

Ontan pa komon. Amen.

(Based on the “Meditation on the Fourth Sunday of Lent: Stewards of Light and Life” by Archbishop Socrates B. Villegas, DD)