Saturday, April 30, 2011

Say Fiesta na Madibinon Panangasi

Nen taon 2000, diad misa na inpangawat na Simbaan diad altar na saray sasanto ed si Santa Faustina, tan diad inpangabet na balon milenio, inpalapag nen Pope John Paul II so balon fiesta para say interon Simbaan: say Fiesta na Madibinon Panangasi. Saya so silibraan ed unaan a simba kasumpal na Fiesta na Inkioli.

Diad sayan Simba na ka-fiestaan na Madibinon Panangasi, say Santo Papa ya angipalapag na sayan Fiesta so awaten met na Simbaan diad altar na saray sasanto: si Pope John Paul II so birbiren na simbaan a sakey lan Beato, lapud say masanton inpanbilay da. Makabaliksan sirin ya si Blessed Pope John Paul II so natawag ya Beato ed sayan Fiesta na Madibinon Panangasi, sayan Pope ya tinawag met a “Pope of Mercy”.

Anto so Panangasi? No onkekerew tayo na panangasi ed sakey, say mabetbet ya kipapasen tayo et wala tayod kasalanan. Sirin, no onkerew tayo na panangasi, say kerew tayo et say ag-pakaawat na dusa na kanepegan tayon naawat lapud say kasalanan tayo. Balet, aliwan saya labat so kabaliksan na panangasi. Say panangasi et ebat na panangaro ed kipapasen na kairapan. No naabet na panangasi so kairapan o suffering, anapen to so inawa na say walad kairapan. Say Dios ya Ama tayo so “mayaman ed panangasi” (Ef. 2,4) kanian abirbir nen San Pablo ya say Dios et “Ama na amin a  panangasi tan Dios na amin ya ligliwa.” (2 Cor. 1,3).

Si Jesus so nagnap ya pakanengnengan na Panangasi na Ama. Nen naimatonan to ra so totoon narasan, pinakan to ra. Nen nabet to ra so walad kairapan lapud saray liliknaen da, pinpaabig tan tinatambal to ra. Say panangasi so aliwan superficial balet. Saya et radical.

Amta nen Jesus ya say lamut na amin ya kairapan na too et lapud kasalanan. Dederalen na kasalanan so dignidad tayo ran totooy pinalsa na Dios ed indengan to. Dederalen to so relasyon tayo ed say maaron Ama a sobol na bilay tayo. Say kasalanan so aliwa labat ya panag-sumlang ed saray ganggan na Dios; saya et mangiter na sugat ed sikatayo, ya no ag naekal et sarag ton pateyen to itayo! Mangiiter so kasalanan ed say Prinsipi na Kabilongetan ya pakapanyari ed sikatayo, ya anggad say dimonyo so mano-oley lad bilay tayo!

Say twan panangasi so mangiter na ligliwa tan inawa ed sayan kairapan, ya manguyor ed sikatayo et andi-anggaan ya kairapan. Panon? Inatey si Jesus pian naperdona so kasalanan tayo. Say kasalanan a sobol na amin ya kaguguloy bilay tayo, kairapan na bilay, say kaermenan na bilay.

Diad say inkiolid bilay na Katawan, inter nen Kristo ed sikayo so pakaperdona na kasalanan tayo! Saya so tambal, say panangasin pamaabig, ya inmagos ed puso tan diking na Katawan ed tagey na krus diad Kalbaryo para say interon mundo. Tan saya so naawat na amin ya makasalanan ed pankaukolan tayo.

Diad labi na Inkioli na Katawan onya so imbaga tod saray Apostol to: “Siopamay toon pirdonaen yo ray kasalanan to, napirdona ra; siopamay toon ag yo pirdonaen iray kasalanan to, ag ira napirdona." Inkuan na Katawan, “Awat you panangasik. Tan sayan panangasi so iter yod arum.”

Sayan panangasi so  mamerdona na kasalanan tayo, aliwan dusa, aliwan patey, aliwan pasnok ya nepeg tayon awaten, balet, say pakapirdona na kasalanan tayo. Tan naawat tayo so ligliwa tan inawa na bilay ya andi-anggaan.

Fiesta na Dayat natan met ed sayan Simba. Amta tayo diad San Fabian ya say danum na dayat so agnotokor, tan saya et agnamagaan, agnaopot. Onya so Panangasi na Katawan: ag natokor, ag nasukat. Ag-naandi para siopaman ya onkerew na panangasi na Katawan.

Diad sayan Simba na Panangasi, onya so imbaga na Katawan ed si Santa Faustina, samay madre ya nanpayawaran na Katawan nipaakar ed say panangasi: pian makana tan makabaliksan so pansilibra na Fiesta na Madibinon Panangasi, tan naawat tayo so grasia na panangasi na Katawan, sikatayo so man-kompisar, mimisa tan man-komunyon, manggaway kimey na panangasi, ontan met ya igalang so imahen na Madibinon Panangasi. Naani ed ngarem wala so film showing tayo nipaakar ed say bilay nen Pope John Paul II, walay panaon ya pankompisar tayo, walay libor ya nagawa kasumpal tayon mandasal na Chaplet na Divine Mercy.

Say kompisar so instrumento tan sakramento na panangasi na Katawan. Diad sayan sakramento, naawat tayo so sankabalgan ya panangasi na Katawan.

Diad sayan Simba na panagawat tayo na panangasi na Katawan, nengneng yo met so kapusoan tayo: wala ray totoon ambelat so kasalanan dad sikatayo. Say panangasi na Katawan so mangibabaga met ed sikatayo: panemerdona. Say bunga na panangasi et say panamerdona. Diad pangawat tayo na  panangasi na Katawan diad kompisar, komon sipaparaan tayon mangiter na bungay panangasi ed arum: say panamerdona ed saray totoon akapan-pasakit ed sikatayo.

Manmatalek tayo ed say Panangasi nen Kristo ya mangiwanwan ed sikatayo. Itila sirin met ya mangibelyaw: Jesus, I trust in you!

Ontan pa komon.