Friday, April 22, 2011

Good Friday: Pangasinan Reflection

Si Barabbas so sakey ed saray kabkabat ya ngaran ed say Pasyon na Katawan tayon Jesukristo. Siopa si Barabbas? Sakey ya kiminal ya lapud say kasalanan to, sikato so na-okom ya ompatey. Si Barabbas so asintinsia-an ya ompatey ed agew na Paskua. Unong ed say ley na say gobierno na Roma, si Barabbas so ipasak ed krus. Balet, agto manbokbokor: kaiba to ni duaran singa sikato ya asintinsian na patey met. Balet, ed samay agew ya pateyen si Barabbas, sikato so akapaway ed prisoan. Ed samay agew na ipatey to, imbes ya sikato so ipasak ed krus, walay sananey ya inpasak da. Si Jesus iman.

Inpanili nen Pilato iray totoo no siopa so labay dan ibolos: si Jesus o si Barabbas. Lapud say inpansogosg na saray Pariseo tan arum niran manooley diad Jerusalem, saray totoo et si Barabbas so pinili ran ibolos, aliwan si Jesus.

Tan si Jesus so inpasak ed krus.

Balet, say tuay-tua. Si Barabbas so walay krimen tan kasalanan ya ginawa to. Guilty sirin. Si Barabbas sirin so walad silong na dusay patey. Si Barabbas so anggapoy kanepegan ya naperdona lapud sikato so bantog ya makasalanan.

Say tuay-tua, samay krus ya sinakbat nen Jesus et para si Barabbas iman. Samay krus ya inateyen na Katawan et para si Barabbas iman.

Agagik ira, si Barabbas et sikato so mangi-lalaman na amin ed sikatayon makasalanan. Amin tayo makasalanan. Tan lapud sayan kasalanan, walay dusa ya awaten tayo. Tan satan ya dusa et say patey.

Balet, wadia si Jesus. Samay krus ya para sikatayo, sinakbat na Katawan. Samay krus ya bunga na amin iray kasalanan tayo, si Jesus so inpasak diman. Tan inatey. Imbes na sikatayo, si Jesus so angako ed sarayan amin. A singa inpangako to ed si Barabbas. Onya la so kabaleg na panangasi na Kaawan ed sikatayo ran makasalanan.

Ed sayan agew, ingapo tayo so Novena na Madibinon Panangasi. Makabaliksan no akin et natan so gapo na sayan novena. Lapud, nangelan tayo ed say abasan pasyon na Katawan tayon Jesucristo ya nen sikatoy inatey la ed tagey na krus, dinuyok na sakey a sondalo so diking nen Jesus. Aduyok so puso to tan inmagos so danum tan dala. Inkuan nen Jesus ed si Santa Faustina, sakey a madren angipuyanan nen Jesus nipaakar ed sayan mensahe na Madibinon Panangasi, nen inmagos iyan danum tan dala, inmagos so agnasab-sabaan tan agnutokor a panangasi to ed enteron mundo. Sayan krus, ya inter tayo pamagalang tayo et simbolo na panangasi na Katawan. Lapud sayan krus, say panangasi na Dios so tuan naawat, tan inter to ed sikatayo. Sikatayo ran makasalanan.

Say sankamaungan ya balita ya inter na sayan krus: Lapud panangasi nen Jesus, say panmerdona na kasalanan tayo, aliwan dusa so naawat tayo. Onya so panangasi na Dios. Saya so mensahe na krus. Mensahe na Madibinon Panangasi na Katawan.

Agtayo amta no antoy agawa ed si Barabbas, kasumpal ya naawat toy kawayangan to.  Inawat to met kasi si Jesus ya Manangilban to? Abirbir to kasi so panangasi na Katawan ed bilay to? Nanbabawi kasi si Barabbas? Diad sampot, anggaman manlepwa so panangasi na Katawan, walad si Barabbas, tan walad sikatayo no sikatayo so manbabawi, manpataoli, magmaliw ya balon pinalsa lapud say inpanirap, inpatey tan inkiolid bilay na Katawan.

Si Barabbas so akaawat na balon bilay. Amin tayo met so akaawat na sayan bilay lapud pananagasi na Katawan. Ontan la komon ya amin tayo et birbiren tan manmatalek tayo ed sayan panangasi na Dios ed sikatayo.

Ontan la komo.