"Kampega lan walay singa apoy a manliub ed puso ta, nen mitotongtong ed sikatad dalan tan ipapaliwawa toy Masanton Sulat."
Walay taloran parte na say Ibanghilyo tayo ya abasa natan nipaakar ed saray dwaran disipulo ya maermen tan apanoy Sikara so ontataynan ed Jerusalem. Paonla ra ed Emaus. Diad dalen, nabet day Jesus. Aki-istoryaan ed sikara. Tan inpaliwawa nen Jesus ed sikara so Salita na Dios nipaakar ed say Mesias. Diad Emaus, inimbitaan day Jesus ya mipondo ed sikara. Angan ira. “Nen karongo rad lamisaan angalay tinapay, akisalamat ed Dios, pinipisag to, insan to inter ed sikara.” Nen biglan naandipat si Jesus, sarayan dwaran disipulo so pinmawil ed Jerusalem ya awit day maong a balita: si Jesus so mabilay.
Anto rayan taloran parte na sayan Ibanghilyo? Unaan, say inpanpaliwawa nen Jesus nipaakar ed say Salita na Dios. Kumadwa, say inpamisag na tinapay na Katawan diad pandem da. Kumatlo, say inpawil dad Jerusalem ya awit day maong a balita.
Sarayan taloran parte et kabaliksan to met so parte na say misa ya sisilibraan tayo ed sayan simba. Unaan, say Liturgia na Salita. Sayan unaan a parte na misa, dedengelen tayo so Salita na Dios diad saray babasaen: saray dwaran babasaen ed Daan tan Balon Sipan, say Salmo tan say Ibanghilyo. Diad sayan bekta, a singa saramay dwaran disipulo, nepeg ya lukasan tayo so puso tayo, tan dengelen tayo so Salita na Katawan. Kerewen tayo met ya lukasan na Katawan so kapusoan tayo pian naliwawaan tayo na say Salita na Dios.
Kumadwa, say Liturgia na Eukaristia. Kasumpal ya aliwawaan iray disipulo, sikara so akirongo ed si Jesus. Dimad lamisaan. Si Jesus et angalay tinapay, akisalamat ed Dios, pinipisag to, insan to inter ed sikara. Diad syan bekta, abirbir da si Jesus! Saya met so gagawaen tayo. Tan diad Eukaristia, komon nalukasan met so mata tayo tayo tan nabirbir tayo so kiwawala nen Jesus ed kapegleyan tayo. Aliwan tinapay labat la so akoen tayo, no ingen si Jesus a Dios tan Katawan tayo, si Jesus in inmolid bilay! Diad mata na pananisia tayo, birbiren tayo ya agtayo manbokbokor. Kaiba tayo si Jesus. Wadiad kapegleyan tayo so Katawan. Si Jesus mismo so aawaten tayo!
Kumatlo, say panangibawag na maong a balita. Diad kasumpal na misa, onya so narengel tayo na ibaga na pari: Asumpal lay misa, lakayo ed kareenan nen Kristo. “Lakayo!” Onla kayo! Kasumpal ya nangel so Salita na Katawan, tan abirbir tayo so kiwawala na Katawan ed dili tayo tan diad komunidad unong ed say inpangako tayo ed say Laman tan Dala na Katawan, sikatayo natan so naibaki. Onya so ginawa na saramay dwaran disipulo: aliwawaan ira na Salita na Dios, abirbir day Katawan diad say inpamisag toy tinapay, sikara natan so pinmawil ed Jerusalem ya awi-awit da so Maong a Balita! Mabilay si Jesus! Wadiad kapegleyan tayo so Katawan! Kaiba tayo si Jesus! Diad sayan kumatlon parte, sikatayo natan so naibaki diad kaabongan tayo, diad kawalaay kimey tayo, anggad iner man ya laen tayo ya awi-awit tayo so maong a balitan naawat tayo ed sayan misa na Simba!
No maminsan sikatayo so mimisa ya dakerakel so walad kanunutan tayo odino wala ra so pagpaga tayo a singa saramay dwaran disipulo ya manaakar ya mamaarap ed Emaus. No maminsan, dakerakel met so panduarowaan tayo sakbay tayon akoen so Katawan diad Eukaristia. Balet, anggan saksakey ya misa so sarag ton awiten to itayo ed balo tan inmolid bilay ed Kristo.
No mimisa tayo, say mabetbet et anapen tayo no anto so naawat tayo. Malinlinew ya diad say Misa, naawat tayo so Salita na Katawan, say Laman to diad Eukaristia tan say misyon ya mangibabaki ed sikatayon mangawit na Maung a Balita ed arum.
Komon, mimisa kayon mabetbet. Inagew-agew komon ingen. Pian mansiansia ya manliub so puso tayo para si Kristo ya inmolid bilay! Ontan pa komon. Amen.
