Kumalabin-apat a Simba (A): Pangasinan Reflection

Nen nangasolinaak, minmulagat ak nen aneng-neng ko so presyo na gasoline! “Agay lay irap na bilay!” kuanko. Say kuanton inmebat lalaingen imay gasoline boy: "Mairap so pobre, Father!"

Say labay ton ibaga, ontagey iray sasaliwen. Onirap so bilay. Manbelat lan manbelat so sasakbaten ya kairapan na bilay. Say tua, dakerakel so irap na too. Inagew-agew walan walay kairapan ya aarapen tayo. Problemad pamilya. Diad trabaho. Diad personal na bilay. Agtayo naupotan na kairapan ya mamapabelat na bilay tayo. Kanian no maminsan say mabet-bet ya kuan tayo: "No anggapo labat irayan kairapan na bilay tayo, mainawa tayo la!"

Balet say katwaan ed bilay onya: Kaibay bilay na too so mankimey. Kaibay bilay so sakit. Kaibay bilay so itaken. Kaibay bilay so onakulaw. Kaibay bilay ya sikatayo so nakesawan, naeresan, naapgaan. No maminsan, mapagpaga tayo ed saray arapen na bilay tayo. Agtayo la ontotondan manaaburido. Manpapaga.

No komon, kuan tayo. Anggapo larayan amin.
"Dago kayod siak, amin yon nakekesawan ed panaawit yoy ambelat, ta pampainawaen ta kayo." Sikato yay insipan na Katawan. Para sikatayo ran nanairapan. Nabebelatan. Ngal-ngali lan man-give up!

No sikatayo so walad andokey ya biyahe, ontunda tayo ed RESTaurant. Pasen ya panpainawaan. Panganan pian nawalaan tayo lamet na biskeg ed biyahe tayo. Diad biyahe tayo, onla tayo met et REST rooms. Odino diad saray REST Stops. Diad sarayan pasen, magano tayo labat. Wadman tayo labat anggad sikatayo so makapanpainawa. Agtayo manayam lad man. Agtayo la manayam diad restaurant. Odino diad Rest rooms o comfort rooms. Amta tayo ya kasumpal tayon ondalan ed sarayan pasen, ituloy tayo lalamet so biyahe tayo.

"Dago kayod siak, amin yon nakekesawan ed panaawit yoy ambelat, ta pampainawaen ta kayo." Diad gapoy gapo na biyahe tayo, agtayo lilingwanan komon ya kaiba tayo la so Katawan. Agto itayo papaulyanan. No maminsan balet, si Kristo a Katawan tayo so nalingwanan tayo ya kaiba tayo ed sayan bilay. Agtayo ontatawag ed sikato. Diad arum tayo manaanap na inawa. Nanaekalan tayo no maminsan na talek ed say panangasi tan panangaro na Katawan.

Panon itayon itdan na painawa na Katawan? Diad saray Salita to. Diad saray sakramento na Simbaan, laut la ed say Eukaristia tan say Kompisar. Diad say pikakasakey na ma-Kristianon komunidad tayo. Agtayo ontotondan mandasal. Mitongtong ed say Katawan, ya ag-onsawa ya ondengel ed sikatayo. Naalmo itayoy pakapanpainawaan tayo ed saraya, ammin ya manlalapud si Jesus a Katawan tayo. Anggad nasabi, sikatayo so tuan walad ligliwad kiwawala na Katawan diad panarian to.

Komon, naalmo tayo so biskeg na ilalo tayo ed say panangaro na Katawan. Komon naalmo tayo so inawan iter na panangasi na Katawan ed sikatayo. TA pian ontan, agtayo onsawa ya mangaro ed arum, agtayo la man-give up ya mangiter na panangasi tan mankimey na panangasi ed arum. Pian ontan, diad madibinonn kiwawala na Katawan, naalmo tayo so biskeg na tuan bilay a disipulo nen Kristo.  Ontan la komon.