Saturday, June 25, 2011

Solimnidad na Laman tan Dala nen Kristo

Sisilibraan tayo ed sayan Simba so Solimnindad na Laman tan Dala nen Kristo odino Corpus Christi. Akin et wala yan silibrasyon ed Simbaan tayo?

34CorpuschristiADakerakel so pikasakeyan tayo ed saray arum a relihiyon tan simbaan. Anggaman ontan, wala ra met balet so pidumaan tayo ed sikara, anggaman Kristiano ra. Say sakey tan sankabalgan ya pidumaan na sikatayo ran Katoliko ed saray Protestante tan saray dakerakel ya Born Again, et nipaakar ed say Eukaristia – say Masanton Misa. Kanian, say fiesta na Corpus Christi et anggapo ed sikara.

Akin? Walay taloran panmutektekan tayon bengatla pian makabaliksan so pakatalus tayo ed sayan sankamatalongaringan ya sakraminto ed bilay na sakey ya Katoliko.

Unaan, Anto ya. Kumadwa, panon ya nagagawa ya. Kumatlo, akin et inter na Katawan iya ed sikatayo.

Unaan, diad gapoy-gapo say pananisia tayo unong ed say bangat na Simbaan et si Jesukristo mismo so twa tan peteg so kiwawala ra ed sakraminto na Eukaristia. Lapud saya, say Eukaristia so sankabalgan ed amin ya sakraminto! Say kiwawala nen Kristo et aliwan simbolo odino singa aliling to labat. A singa say bandira et simbolo na bansa, balet aliwan bansa imay bandira. Odino, crucifix et simbolo na impatey nen Kristo ed krus, balet aliwan si Kristo mismo tan twan iman.

Balet, diad Eukaristia, say kiwawala nen Jesus, sirin si Jesus a Katawan tan Dios tayo mismo so walad masanton Eukaristia. Diad say Ibanghilyo tayo natan, aminem ya imbaga nen Jesus ya say laman to et twan kanen tan say dala to et twan iinumen! Tan saya so nagawa diad ibalikas na pari ed Misa: “saya so laman ko … saya so dalak!”

Kumadwa, panon yan nagagawa? Kada silibrasyon na misa, anggan iner iya tan anton panaon, wala sirin so mamistirion milagaro so nagagawa. No si Jesus et pinagmaliw ton alak imay danum diad bansal na Cana, diad amin a misa, say Dios a Katawan et pagmaliwen ton laman tan dala to so tinapay tan alak ya imbagan tayo.

Say Dios labat so manaaboloy ed saya. Say Dios labat so makagawa labat na onya! Say Dios labat so makagawa na milagron!

Kanian, anggaman amta tayo ya sayan tinapay tan sayan alak et magmaliw ya peteg tan twan laman tan dala nen Kristo, agtayo amta no panon ya nagagawa iya. Kanian, aliwan say mata na laman, no ingen say mata na pananisia so mangibebelyaw ed saya. Kada itagey na pari so tinapay, tan say kupa na alak, say kuan tayo: My Lord and My God! Say Katawan tan Dios ko!

Kumatlo, akin et inter ya na Katawan ed sikatayo? Diad kalawakan, pinabiskeg tan naitdan iray bilay iray Israelita lapud say manna ya inter na Dios ya kanen da, inagew-agew. Saya so inpanunont nen Moises ed saray totoo, unong ed say unaan ya babasaen. Ontan met sirin, a sayan Eukaristia so inter na Katawan ed sikatayo, aliwa labat ya pakanudnutan ed say Katawan, no ingen pian diad inagew-agew ya bilay tayo, say laman tan dala nen Kristo, a twa tan peteg ya kanen tan inumen tayo et mangiter na kabiskegan so makristianon bilay.

Anto sirin so nepeg ya pangawat tayo ed sayan sankabalgan ya sakraminto ed bilay tayo? Panon tayon nipanengneng iyan pananisia?

Sayan mamilagron kiwawala nen Kristo a Katawan so rason no akin ontan lay kabaleg ya galang tan dayew ya iiter tayo ed sayan Eukaristia. Kanian, sikatayo so ontatalimokor ed arap na tabernakolo lapud si Kristo so kaiba tayo, 24/7; sikato met so rason no akin et pararakepen o simbaan: ta wadia so kiwawala na ari na saray arari!

No onloloob tayo ed simbaan tan sikatayo so mimi-misa, walay nepeg ya kawes tayo ya usaren. Kaloob yod simbaan wadman iray proper ya kawes tan saray ag nepeg ya isulong no sikatayo so mimisa. Wala irayan tumboken ta lapud say baleg ya pamagalang tayo ed say kiwawala na Dios diad sakraminto na Eukaristia.

Ontan met ya agtayo mangaako na communion no walay amta tayon mortal odino ambelat ya kasalanan tayo, tan agtayo ni akapan-kumpisar lapud kada kasalanan tayo et sumlang iya ed say aakoen tayon a Dios – say Katawan tayon Jesukrito mismo.

No wala tayod dalem na simbaan, agtayo maingal tan man-esaes tayo labat lapud say iter tayon galang ed say kiwawala nen Kristo tan say courtesy ya iter tayo ed saray labay day mandasal.

Wala met so adoration na Blessed Sacrament ya gagawaen tayo, binulan-bulan pian iter tayo so panangidayew tan pisasalamat tayo ed say Dios tan awiten tayo so amin ya nakaukolan tayo ed sikato.

Amin iraya et gagawaen tayo a manlalapud say pananisia tan say panamirbir tayo ed sayan masanto tan magnayon a kiwawala nen Kristo ed say sakraminto na Eukaristia.

Itilan misalamat sirin ed say Katawan lapud sayan nidumaduman regalo tod sikatayo. Diad pangako tayo ed say Katawan diad communion, isipan tayo ed sikatayo ya agtayo komon iya papaolyan tan daraken iyan sankabalgan ya regalo na Katawan ed sikatayo --- say masanton kiwawala to ed sakraminto na Eukaristia. Ontan pa komun. Amen.