Siopa tan anto so bibirbiren tayo ran successful ya totoo? Samay asumpal to so aral to insan presidente na companya? Samay mayaman la? Samay walad atagey ya posisyon? Anto so sukat o bases ya nibaga tayon say too et "successful" ed bilay to?
Nen saman, angaliw si amak na balon Television. Black and White. Wala ni so baleg tan maelt ya cabinet to. Marakep imay TV. Bali -bali itsura to. Radiola so tatak to. Osilan mi ya lanang ya manbantay na TV. Balet, walay baleg ya problema. Burarog. Makapoy so reception to. Marakep imay TV, singa uran ya lanang balet so nababantayan mi. Kanian, inapiger imay antenna! Ginawan atagey. Inyarap ed Baguio ta diman kuno so panlalapoay transmitter. Tua, linminey. Balet no maragem tan siguro no uran ed Baguio, burarog tan ngalngali anggapo so naala mi ya picture.
Samay TV mi ya makapoy so reception to so aliling to may istorya nen Jesus nipaakar ed samay dumaralos ya nansibwag na bokel ta sikato so mantatanem. Amin ya bokel so dinmapo. Balet, aliwan amin so abilay tan nanbunga. Walaray pigaran naplag ed mabaton dalan, masabit ya pasen tan marakep ya dalin. Amagaan tan inatey ira likud ed saramay walad maong ya dalin. Sikara so binmaleg tan nabunga na dakerakel!
Say salita na Dios so aliling to may bokel ya insibwag ed nanduruman dalin. Sikatayo iraman so dalin. No anton klasen dalin so akaplagan na bokel, ontan la no panon tayon awaten so Salita na Dios ed bilay tayo. Ontan met so aliling na reception na TV. Anggaman marakep imay TV, mandepende ya talaga ed say reception no panon ya kalinew o kaburarog so nabantayan.
No ompawil tayo ed samay onaan ya tepet tayo: "Anto so pakaneng-nengan ya say too et 'successful' ed bilay to?" Say ebat unong ed si Kristo ed samay toon aliling to may dalin ya tinuboan na bokel tan sikato so nanbunga na dakerakel. Odino, samay TV ya marakep so reception to kanian malinew so nababantayan. Sirin, para si Jesus, siopamay na makangel ed say Salita na Dios tan walay sebeg ton ibilay iya, sikato so natawag ya "succesful"!
Say Salita na Dios so anggapoy kakulangan to. Say Salita so nanlapud Dios. Tan sayan Salita na Dios so manaanap na tubuan to. Tan panbungaan to. No sayan bokel et inatey tan amagaan, aliwan lapud walay kakulangan na Dios. Aliwan lapud say Dios so makapoy ya mantanem. Amagaan iyan bokel a salita na Dios lapud walad sikatayo so kakulangan. Sikatayo ran dalin ya agtayo initdan na pankanawnawan onbulaslas tan nabilay ya anggad manbunga iyan bokel ed bilay tayo.
Namamagaan iya lapud napapaulyan tayo. Nalilingwanan tayon salogen . Agtayo aasikasoen. Wala manaya iyan bokel ya intanem na Dios ed sikatayo.
Panon tayo sirin ya napabulaslas iyan Salita na Dios ed bilay tayo? Sayan bokel ya nanaawat tayo ed say panbabasa tayo na biblia o say ibanghilyo? Diad pangawat na saray sakraminto na simbaan? Diad panag-gawa na kimey na panangasi?
Say Dios a Katawan bibirbiren to so kawayangan tayo, odino say freedom tayo. Sayan Dios, anggaman wadtan lan lanang ya mantawag tan isisibwag to so bokel na salita to, et agto itayo pasouten ya dengelen tan awaten iya. Walad sikatayo no panon sirin so reception ya iter tayo. Singa tayo TV. Walad sikatayo lan amin. Walad sikatayo so kakabatan tan panangaro. Nepeg ya paiger tayon sibobolos so antenna na bilay tayo. Malinew so reception tayo kasi ed say Salitay Dios?
Siopa sirin so "successful" ya too? Aliwam kayamanan, aliwan position, aliwan pakapanyari.
Say toon dedengelen tan natalusan to so salitay Dios. Tan sikato so mambunga. a sanlalasus, wala ray sananemaplo, tan wala met a santatalomplo.
Ontan la komon.
