Limaran tinapay tan dwaran sira labat so nalmo da ray disipulo nen Jesus ya pamakan da ed saray limalibon lalaki ya linman ondengel ed si Jesus. Sikato ya inter da ed si Jesus. Manisia ra kasi ya napakan to ra lapud sayan limaran tinapay tan dwaran sira?
Diad gapo anengneng la nasaray disipulo nen Kristo ya dakerakel so totoon tinmonbok ed sikato. Tan sarayan totoo et wala rad kalawakan. Sikara natan so narasan. Aburido larayan disipulo. Say labay da: pasempeten lara ta anggapo kuno so ipakan dad sikara. Marakep ya plano. Praktical ya solusyon
Balet inkuan nen Jesus ed sikara: Sikayo mismo, pakan yo ra!
Kanian, nananap ira na kanen. Limaran tinapay tan dwaran sira labat so nalmo ra. Tan lapud saya a nanlapud too, limanlibon lalaki tan dakerakel ni ran bibii tan ogogaw so akapangan.
Anto so kabaliksan na sayan milagro na Katawan.
Unaan, amin ya nakaukolan tayo et naalmo tayod say Katawan. Say Dios tayo et
Dios ya mamapano na kakulangan tayo. Mabunlok so Dios. Kabat na Dios no anto so twan nakakukolan tayo, tan lapud panangasi tan pananagro tod sikatayo, agto itayo sarag ya paulyan. Saya so inpanengneng na Katawan nen anengneng ton naknaksawan tan narasan laray totoo. Pinakan to ra.
Kumadwa, panon so inpamakan na Katawan? Say instrumento na grasya na Dios et say too lan lamang. Pian napakan na Katawan iray limanlibon too, nepeg ya walay iyawat na too ed say Katawan. Para say Dios, no antokaman so iter tan ibagat ed say Dios, awaten na Dios, no saya et inter a mabalos. Anggaman no maminsan et melmelagen tayo iya. A singa “limaran tinapay tan dwaran sira” labat.
Say importante ya agtayo lingwanan: sayan grasya a manlalapud Dios so ag onbulaslas no say too et isiblet to so dili to, odino sayan totoo et anggapo so gawaen to. No anggapo so iter tayo ed Dios, obulaslas kasi so walad sikatayo?
Kumatlo, no mabunlok tayon mangiter ed say Dios, agnasukat tan ag nabilang so naawat tayo a manlapud say Dios. If we give as he has given, we will receive more than we can imagine.
Say kera ya atipon na saray disipulo to, a nanlapud samya “limaran tinapay tan dwaran sira” et: labindwan tiklis! No anggapo so takot tayon mangiter ed say Dios, dakel tan ag-nasukat so ompawil ed sikatayo. A singa labindwan tiklis a tinapay!
Dway simba la so apalabas nen in-launch tayo so “Mission: 143+44. Magmaliw iyan fruitful ya fund raising project tayo no ekalen tayo so takot tayon anggapo so natilak para sikatayo tayo ed say Simbaan, anggaman saya et aliling toy “limaran tinapay tan dwaran sira”. Say takot et kabaliksan toy anggapo so panagmatalek tayo ed say Dios. Say takot ingen so manesebel ed sikatayo ya mangiter, no inget manatangoyor ed sikatwayo ya iyamot, isinop tan agla iter ed say Dios so amta tayon “limaran tinapay tan dwaran sira” ya walad sikatayo.
Nunot yo labat: no samay too ya angawatan na saray dispulo na sayan “limaran tinapay tan dwaran sira” et imbes ya in-donate to ed sikara, et inyamot to, insinop to. Inkotkot to lapud natatakot ya no iter to, sikatao so naupotan na kanen? Wala kasi so labindwan tiklis ya tinapay so akera?
Agagik ira, say Dios mabunlok a Dios. Aliwan masiblet. Ilaloan tayo ya kasumpal na apat bulan, say “Mission:143+44” et naipalagey tayo la so marakep tan baleg ya retablo tayo. Balet, ag iya nagawa tan nasumpal, no wala ni tan baleg so takot tayo et sikatayo so naupotan tan naandian no walay ipikabiangan tayo ed sayan mission. Ed sayan simba, walay assurance tayo: say Dios aliwan masiblet. Tan agpatalo ed inkabonlok to. . If we give as he has given, we will receive more than we can imagine.
Ontan la komon.
