“Diad liket to, inlako ton amin iray kayaryan to, insan pinawil tan sinaliw to may alog.”
Diad sayan istorya na Katawan nipaakar ed samay too ya akalmoy kayamanan ya nikotkot ed sakay a dalin. Say kuan na Katawan, “ Diad liket to, inlako ton amin iray kayaryan to, insan pinawil tan sinaliw to may alog.” Sayan istorya et nipaakar ed say Panarian na Dios, tan no panon yan asankaimportantean ed bilay na sakey ya Kristiano.
Nen nalmo to man ya too so kayaman ed sakey ya dalin ya agto kayaryan, tampol a sinaliw to man a too imay dalin. Pian labat et agla nabalang tan makaarawi iman ya kayamanan ed sikato. Balet pian nasaliw to man ya dalin (tan samay kayamanan), inlako to nin amin so kayaryan to! Amta tayo kasi so kabaliksan na sayan ginawa na too ed bilay to?
Unaan, walay pasimbalo na panagbilay to. Pian labat nagamoran to may kayamanan, nakaukolan toy mansalat na panamaakaran na panagbilay to. Nen inlako to iray kayaryan to, sipaparaan ya manbilay ed inkaraiset. From having so much to being nothing. Sipaparaan ya itbanan iray kaugalian to. No sikato so nanaogip ed anlemek ya dukolan, sinarag to naogip ed datal ya anggapoy kutson tan danganan. Ta lapud inlako ton amin so kayaryan to. No mabetbet ya oonla ed Jolibee, McDo, tan sikato so manluganan, sinarag toy agla manmeryenda. Mangatgat lay agat labat la. No nen saman et manag-sigarilyo, no nan saman et oniinom na sankablin alak odino mabetbet ya mansop-drinks. Manlugan ed kotse. Mabolos ton inekal iraya. Insalat to iraya pian nen inlako to so amin ya kayaryan to. Pian labat, nasaliw to dalin ya akalmoan toy kayamanan. He was willing to give up his comforts in his life, to sacrifice for the sake of the great wealth he found.
Kumadwa, walay pasimbalo na puso, panag-nunot to. Inlako to iramay kayaryan aliwan lapud sikato so napapasuoten tan maermen ya ginawa to. Andi! Unong ed say istorya na Katawan, “ Diad liket to, inlako ton amin iray kayaryan to, insan pinawil tan sinaliw to may alog. Anggaman mairap ya gawaen, ginawa ton maliket iya. Ta say twa, agylay irap ya itbanan so apasalan lan bilay. Akin et sinarag ton ginawa iya?
Ta lapud abirbir to so twan kayamanan, say kayamanan ya mangiter ed sikato na liket ya anggapoy mipara. Ag nasukat na anggan kantidad.
Nen in-launch tayo so “Mission: 143+44”, dway simba la so apalabas, say amtak et sakey labat yan fund raising na parokya tayo. Agko ilaloan ya sakey met ya manayan pamasimbalo na panag-bilay tan puso na parokya. Diad panlabay na dakel ya mikasakey ed say poyekto na parokia, wala ray angibaga ed siak: “Father, labay mi so ontulong tan mikasakey. Agmi nagawaan itan no anggapo so salat na panagbilay mi tan saramay nakakaugalian min gagawaen.
“Imbes na man-painom ak, samay isaliw koy alak, et iter ko lad Mission 143+44. Kaibak ya manpaalagey na retablo tayo, Father,” kuanto.
Tan onya met so maong a balita para sikatayo amin ed sayan simba. Say Panarian na Dios so nalmo tayo la. Sikato ya sakey ya kayamanan para sikatayo. Agtayo ya balet nagamoran no anggapo so pansalat na panagbilay – a change of lifestyle. Maliket ya benegan iray sumpalng ed sayan panarian; maliket ya itbanan iray kaugsan pian makaarawi tayod sayan sangkabalgan ya kayamanan ed bilay tayo – say Katawan tan say panarian to.
Gawaen tayon oliran imay toon walad istorya na Katawan: lapud nalmo tayo la so sangkabalgan a kayamanan ed bilay tayo, saragen tayo komon ya itbanan ya amin pian labat walad sikatayo si Kristo tan say panarian to. Ontan pa komon. Amen.
