Saturday, July 16, 2011

16th Sunday (A): Pangasinan Reflection

Akin et aabuloyan na Dios so kaugsan? Anto so usar na pakapanyari na Dios no andi ebas so kaugsan tan say kairapan na saray walad kamaungan? Panon tayon talusan so pakapanyari na Dios? Sikato ya kasi et usaren na Katawan pian nadusa iray matatakew tan matitila? Sikato ya kasi so tampol ya usaren na Dios pian naandi lad kapegleyan tayo so amin ya mauges tan manlalames na totoo?

Unong ed say istorya nen Jesus nipaakar ed samay dumaralos ya nansibwag na bokel pian mantanem. Saya balet so sinibwagan na bokel na dika pian naderal so ani to may dumaralos. Labay na saramay aripen na dumaralos ya bagoten dan tampol iramay dika, balet agto labay. Diad panag-ani la pansianen so dika tan pagey. Inaboloy na dumaralos ya nabilay ed saksakey ya dalin iray dika tan saray pagey.

Diad sayan istorya, naalmo tayo so ebat na saray tepet tayo. Unaan, say Dios agto la nakaukolan ya pruwebaen ed dili to ya sikato so Dios. Ta Sikato so Dios ya makapanyari. Balet, say pakapanyari na Dios et ipapaneng-neng to diad agnatukor ya panangasi to tan say panamirdona to. Say Dios et panangasi mismo. Tan say pakapanyari to et naalmo diad panangasi to!

Panon yan talusan? Tua, say Dios et dusaen to met lamlamang iray mauges tan iter to so tumang na saray maong unong ed say panagtoor tayod saray ganggan to. Ta say Dios et matunong met a Dios. He is a just God, too. No agtayo nanaimatonan iraya natan, diad sampot na panaon, diad oras na okum, nasumpal iyan amin! Balet anggad, anggapo ni tan ya panaon, say kinasanto tayo et nepeg ya onbolaslas tan onbiskeg diad mundon apanoy kaugsan tan kasalanan.

Kumatlo, lapud say pakapanyari na Dios et naalmo diad agnatokor ya panangasi to, sirin dakerakel a pankanawnawa tan panaon so iiter na Dios ed sikatayo ran makasalanan ya manpataoli tan manbabawi, ya onkerew ed say panangasi to. Para say Dios, say sankaawetan ya makasalanan so mankaukolan na sankabalgan ya panangasi! The greater the sinner, the greater the mercy of God!

Lapud sayan istorya na Katawan kumon na nanaimatonan tayo so kasalanan, kaugsan, tan saraya et gagawaen na totoon singa sikatayo, say walad puso tayo komon et aliwan say "No kapigan onsabi so dusa tan inkaandi na amin a makasalanan?" balet "No panon ya say makasalanan et makaawat na mapangasin panamerdona na Dios?" Sirin, aliwan say panag-kondena no ingen say pikakasi so nakaukolan tayon amin a makasalanan pian ontan et sikatayo so makapan-pataoli tan ompawil tayo ed say Ama a Dios tayo. No wala sirin so mamapairap, mankokol-kol ed sikayo, manlalabir tan manlalames, agyo ra met kokolkolen, dederalen tan balesan. Balet, idasalan ira pian walad sikara so panag-babawi tan panag-pataoli. Tan diad pandarasal tayod sikara, mapa-abeba tayon akoen ya lapud say panangasi na Dios, sikatayo so wadiad sayan kipapasen tayo. Tan lapud say panangasi na Dios, ag itayo paolyan na Katawan a Dios tayo. Ontan pa komon. Amen.