30th Sunday in Ordinary Time: Pangasinan Reflection

Jesus, Anak nen David! Kasian mo ak! Sikato ya so pikakasi nen Bartimeo ed si Jesus. Si Bartimeo et sakey ya mipapayabol tan sakey ya bulag. Mair-irap so kipapasen nen Bartimeo. Walad kabilongetan. Tan lapud ag-makanengneng, anggapo so nasarag ton arum ya gawaen no ag ingen mipayabol pian sikato so nabilay. Kanian, nen nangelan ton si Jesus so ondadalan dimad kawalaan to, ontan la si paneyag to ed si Jesus: "Jesus, Anak nen David! Kasian mo ak!"

Nangel iya nen Jesus. Tinawag to ya onasinger ed sikato si Bartimeo. Insan to pinaabaig. Akeneng-neng si Bartimeo. Sayan makapalik-liket ya agawad si Bartimeo et ag nansampot nen sikato so akaneng-neng la. Unong ed say ibanghilyo, wala ni mas makapalik-liket ya agawa. Unong ed si San Marcos: Si Bartimeo so "inmabig ed saman a bekta tan tinmombuk ed kinen Jesus." Si Bartimeo nagmaliw ya disipulo nen Jesus. Nagmaliw ya manumbok na Katawan.

Walay pakabirbiran tayo ya si Bartimeo et kabkabat na saray unaan ya Kristiano nen saman. Lapud kabat da so ngaran to tan say ama to. Pigpigara so abitla ran ngaran ya tinatambal nen Jesus. Anggan samay pinaoli tod bilay ya taga Naim et tinawag na saray Evangelista ya anak na sakey ya balo a taga Naim. Samay inaponan na dakerakel ya dimonyo et ya pinaabig nen Jesus et agmet abitla so ngaran to.

Walay sakey ya singa insignificant detail nen si Bartimeo so tinawag nen Jesus. Si Bartimeo so tampol ya inekal toy kolibemben to, biglan inmalagey, tan sinmingger ed kinen Jesus. Si San Marcos ya Evangelista mabetbet ton impaamta ya no walay labay ton ontumbok ed si Jesus, walan-wala so itilak to pian sikato so maka-piolop lad si Jesus. Si Simon tan si Pidro, intilak day iket da. Si Juan tan si Santiago, intilak day ama ran kaiba to ray arum ya sumisigay. Si Mateo ya sumisingil na buis, tinaynan to so opisina to. Labay nen Jesus ya samay inmasingger ya mayaman ya balolaki et ilako ton amin so kayamanan to insan to tumboken si Jesus. Ontan met si Bartimeo, intilak to so kolibenben to.

Saman ya kolibenben et nabirbir tayon kayaman nen Bartimeo. Saman ya abel et aliwa labat ya usaren to no naogip pian ag-ambetel odino ag naket-ket na insekto, saman ya kolibenben et uusaren ton pana-anapan toy bilay. Saya so ibilkag tod gilig na dalan, no sikato so manpayabol, tan diman ipelag so abuloy tan payabol na saray totoo. No anggapo man ya kolibenben to, baleg so nabalang ed si Bartimeo. Aliwa labat ya abig na laman, no ingen pati pan-anap toy bilay.

Onya sirin so mensahe nen Bartimeo ed sikatayo. Siopaman so labay ton ontumbok ed si Jesus, walan-wala so itilak tan benegan to. Anggapo arum no aliwan saray kaugsan, kasalanan tan anto ran bengatlan mangogoyor ed sikatayon onarawi, imbes ya onasingger tayo ed si Jesus. Pian anggapo so sumlang ya magmaliw tayon tuan disipulo nen Jesus, neng-nengen tayo ed dili tayo, tan diad klasen panagbilay tayo irayan sarag tan nepeg ya itilak tayo. Bengatlan sobol na kaermenan tayo, sengegan na kasalanan odino kaugsan, anggaman angkekelag ingen ya agtayo asasikasoen, balet mangiiter na kaermenan ed arum tan diad pamilya: say inkangiras bilbilang, say inka-pasnok no maminsan, saray bisyo, say inkalastog tan inkatila.

Komon magmaliw ya oliran tayo si Bartimeo. Mairap bilay, balet sipaparaan ya intilak to sakey ya kayaryan to, pian sibobolos ya ontumbok ed si Jesus. "Kasian mo ak!" so pikakasi nen Bartimeo. Jesus, kasian mo kami. Ontan met si pikakasi tayo. Sikatayo ran makasalanan. Jesus kasian mo kami, pian sikami so manpasimbalo ya ontumbok ed sika, Katawan min Jesukristo.

Ontan la komon. Amen.