Walay sakey ya bii inagew-agew ya mantatalimokor ed simbaan ya manpipikasi ya akatongtong nen Father. "Father, agaylay irap na bilay. Ipipikasik so pamilya mi ta lapud samay asawak. Agko amta no akin et naasawak iman. Labay ko met la ya ondeen tan ondakep met so pamilya mi." Anto sirin so kekerewen yo ed Dios?", tepet nen Father. "Pian ondeen met lay pamilya mi tan onaligwas kami met la, komon ompatey la may asawak, Father!"
Nen saman, nen sikara ni so balon kasal, singa anggapon balot so nanengneng ya makapoy ed si asawa to. Amin maong. Sikato so prinsepe. Makisig. Sankaguapowan. Sikatoy amin a bilay to. Ag nabilay no anggapo ed abay to! Balet natan say ipatey na say asawa to so bilay to la!
Onya so makapaermen ya nagagawad say kipapasen na saray mankakasal. Unaan, dakerakel so mankakasal ya ogogaw ni ra; tan ondarakel met so mansisian ya sanasawa. Tan lapud sayan pansisian, baleg so epekto to ed pamilya, anak tan say sociedad tayo ingen.
No wala ray interview-en ko ya labay day mankasal, tan tepeten ko no akin et labay da la so mankasal, saksakey tan apasakey so ebat da: "Father, inararok ya maong". Marakep ya ebat. Ya singa say aro labat so nakaukolan pian sikara so manpakasal. Ya singa aro labat so sentro na kasal. Basta walay, aro, anggan anggapo so trabaho. Basta walay aro anggan owap ni ra. Anggan ag amta so manluto. Mankimey.
Say mabetbet ya walad emosyon na saray mangasawa laut la no ogogaw nira et say aro labat so rason tan anggapo lan arom no akin et sikara so manpakasal. Para sikara, say kasal so solusyon na amin ya labay dad bilay: lapud say bii et maloken, pian makasian lara ed ateng da, pian nagawaan da lay laba-labay dan gawaen.Labay da met ya say kasal da et apano na panangaro, "romance", commitment, pankakasakey. Say amta ra, amin iraya, naalmo da ed kasal.
Baleg ya lingo! Ag iraya naalmo ed kasal! Say kasal singa kahon itan ya anggapo so karga to. Nepeg ya kargaan pian walay naalmod satan ya kahon. No labay ya naalmo so aro, nepeg ya walay aroan na sanasawa. No anapen so seguridad, nepeg ya walay iter ya biskeg tan pansiansia anggad irap tan problema ya arapen. No pirawat so aliguas na bilay, nepeg ya iter so kimey, tan trabaho. Say piasainger ed Dios a Katawan. Nepeg ya amta so mandasal, walay biblia ya babasaen.
Panon sirin ya naiiter so maong tan maoksoy na bilay ed pamilya no asakbay iray angasawa, anggapoy trabaho ra, tan ogaw so panagnunot na ama tan ina, o saray sanasawa? Aliwan sakey labat ya liknaan so kasal. Nepeg ya walay maturity, stabilidad ed panagnunot tan emosyon, maaron tan maanos, walay commitment tan tepel na linawa.
Diad sayan bulan na Family Rosary Month na parokya, kerewen ko pad sikayo so intention yo no sikayo so mandadasal na Santo Rosario: para say pamilya, tan laut la ed saray sanasawa, tan saray atateng. Kerewen tayo so bendision na Dios ed para sikayo. Say bokasyon ya pinili yo et bokasyon ya walay asawa tan pamilya. Sakey tan a masanton bokasyon. Diad pamilya yo mismo, komon onbolaslas so panangaro, tan sikayo komon so onaliguas ed panangaro!
Ontan la komon. Amen
