Samay istorya nipakaar ed say inpa-abet da di Jesus tan samay mayaman ya balolaki tan say bangat nen Jesus nipaakar ed say kayaman so mangiiter ed sikatayo na "challenge" diad panagbilay tayo a sakey a Kristiano ed sarayan panaon. Lapud say mundo, say sociedad, say karaklan natan et susukaten da so "success" unong ed say karakel na kayamanan tan kabiskeg so seguridad ed bilay. Nanaimatonan tayo ya diad sarayan panaon, saray mayaman et mas sikara so onyayaman. Say sobsobra ed amin ya bengatla so pakaneng-nengan na ligliwa tan liket ed bilay. No pigara so kawes, sapatos, kotse. No kayaryan so sankabaloan ya cellphone tan sankarakepan ya kawes. Kanian, no maminsan say amta tayo et say pakapanyari tan kayaman so magmamaliw na sukat na inkamaong na bilay. Maong so bilay na sakey ya too no walad sikato irayan dua: kayaman tan pakapanyari. Walay marakep a trabaho, dakerakel tan mararakep ya "kagamitan", atagey so posisyon.
Anggapo so makapoy ed saraya. Aliwan makapoy so mayaman, aliwan makapoy so walad posisyon, aliwan mauges so walay pakapanyari. Ontan met, saray mairap bilay agto kabaliksan ya sikaray mauges tan sikaray maermen; saray anggapod posisyon tan pakapanyari et aliwan sukat ya say too et walad makapuy ya panagbilay.
Tepet na saman a mayaman a balolaki ed si Jesus: "Anto so gawaen ko pian nagamuran ko so bilay ya andi-anggan?" Say ebat nen Jesus: Itbanan tan taynan mo so kayamanan mo. Tan tumbok kad say tuan Dios." Odino, say kuan na Katawan ed saman ya balolaki: Nen tinawag mo ak ya maong, say Dios labat so maong. Lapud abir-bir mo ak ya Dios mo, taynan mo latay kayaman mon dios-diosan mo ta sikara tan so mangi-arawi ed sika ed siak. Natumbok mo ak labat no benegan mo ra tay antokaman ya manesebel ed sika ya magmaliw kan disipulok."
Kanian, mutektuken tayo so mensahena na ibanghilyo natan: No say inkatoo tayo et nasukat labat unong ed saray kayaryan tayo, panon tan siopa tayo la no naandi larayan kayaryan tayo? No say inkatoo tayo et nasukat labat unong ed say pakapanyarin iiter na posisyon tayo, panon tan siopa tayo la no anggapo tayo ed saraya? Wala ni sirin nen say kayaman tan pakapanyari so nayarin mangiter na kabaliksan na inkatoo tan say bilay tayo. Ya anggad mabolos tayon itbanan, siansia tayo nin maliket.
Say tua, natatakot tayo no anggapo la so walad sikatayo, anggapo met la so kabaliksan na bilay tayo. A singa samay mayaman ya balolaki: no naandi ed sikato so kayamanan to, naandi met la so kabaliksan na bilay to. Say tua, tatawagen itayo nen Jesus a Katawan tayo, aliwan unong ed say inkiwala o inkaandi na kayamanan tayo. No ingen say tawag na Dios ed sikatayo et tawag ya sikatayo et walay maong ya pikakasakey tayo ed say Dios tan kapara tayo. No anton klase so relasyon tayo ed say Dios tayo. No anten klase so pitotoo tayo ed saray kapara tayo.
Samay txt ya naawat ko siguro so makapangiter na kabaliksan na saray kayaryan tayo: ag tepeten na Dios ya Katawan no pigara tan anton klasen kotse so walad sikatayo, no ingen, pigara so inlogan tayon mankakaukolan. Ag tepeten na Dios no pigara tan no moda so kawes tayo, no ingen siopa tan pigara so akawesan tayo. Ag tepeten na Dios no anto tan panon ya kabayag tayon nanuley, no ingen pigara tan siopara so atulongan tayo nen sikatayo so walad uley.
Komon saray inter na Dios ya kayaryan tayo, dakel man o daiset, so magmaliw ya instrumento pian nagamuran tayo so bilay ya andi anggaan. Komon lapud saraya et agda itayo guyoren ya mas araoen ira nen say Dios a Katawan tayo tan say kapara tayo. No andi, singa tayo samay balolakin mayaman: lapud kayamanan to, agto naiter so nagnap ya panangaro ed say Dios. Sikato so inmarawi ya maermen. No antokaman komon so mangiter na kaermenan ed sikatayo lapud iyaarawi da itayod Katawan et walad sikatayo komon so biskeg ya taynan tan benegan ira -- lapud panangaro tayo ed say Dios tan say kapara tayo.
Ontan la komon. Amen.
