Say kumanem a kapitolo na Ibanghilyo nen Juan et pakenengnengan na say inpadlepdep nen San Juan nipaaker ed say talus na Eukaristia.
Walay taloran naibaga tayo nipaakar ed say masanton Eukaristia.
Unong ed si Santo Tomas de Aquino, say eukaristia et kanen ed pananakr o biyahe. A food for the journey. Sayan kanen so mangiter na biskeg ed sikatayo.
Amta tayo no anggapoy sustansia na laman ya iiter na kakanen tayo, anggapo so biskeg na laman. Say laman nayarian toy ag naitdan ya panangan ya pigaran agew. Balet, agto nayarian ya manbilay no ag naitday kanen ya mabayag. Agtayo manbayag. Onkapoy itayo. No makapoy tayo la, agtayo la nasumpal so getma tayon laen.
Saray sakraminto na biniag, kompirmasyon, ordin tan say kasal so maminsan labat iran naawat ed bilay na sakey a Kristiano. Balet say sakraminto na Eukaristia so nepeg a maminpigan awaten na sakey a Kristiano. Sayan sakraminto so kanen ya makapangiter na sustansya ed say kamarerwa tayo.
Agtayo nayarin ibaga ya maong so relasyon tayo ed Dios a Katawan, balet agtayo aawaten so Katawan ed masanton Eukaristia. Agtayo nasumpal so biyahe. Ag mabayag, onkapoy so satan ya relasyon. Akin? Lapud ag nanaitdan na sustansya so spiritual ya panagbilay tayo. Agtayo nayarian ya manbilay na sakey a maong a Kristiano no agtayonbalot nanaitdan na sustansiay grasya na Euckaristia.
Kumadwa, say Eukaristia ed tatawagen tayo met a masanton komunyon. Walay angibaga ya nabirbir tayo unong ed say kakanen tayo. We are what we eat. Diad Eukaristia, say aawaten tayo tan kakanen et si Jesus mismo. Lapud saya, sikatayo so mikakasakey ed si Jesus. Tan lapud say pangaawat tayo ed si Jesus ed komunyon, wala sirin so tuan pikakasakey tayo ed say Katawan. Ontan met sirin ya a min ya mankomunyon et mikasakey et Katawan. Tan amin ya mikasakey ed Katawan et mikasakey ed arum. Say pananisia na Katoliko et sakey ya pananisia aliwan manbokbokor. Sakey tan ya communitarian faith. Say pimimisa tayo, tan say pankomunyon tayo et mangingiter na pankakasakey na amin a Katoliko ed enteron mundo.
Kumatlo, unong ed say Ibanghilyo nen Juan, dakerakel so atilak ya tinapay nen si Kristo ed pinakan to ramay liman libon totoo. Insan, natan, ibabaga na Katawan ya sikato mismo so Tinapay na Bilay! Ontan met no nanunutan tayo ed samay milagron ginawa nen Jesus ya inpagmaliw ton alak imay danum. Dakerakel so sobra! Onya so grasya na Dios. Dakerakel. Ag natokor. Sobsobra. Onya met so panangaro na Katawan.
Sikatayo so pinakan na Katawan diad altar to. Inter toy laman to diad nengneng na tinapay. Tan samay atilak ya laman, et saraya so isinop ed say tabernakulo. Tan diad tabernakulo manayam. Say kiwawala odino say presensia na Katawan et magnayon ya wadia ed kapegleyan tayo. Wadia so Katawan a Jesus tayo ed loob na sayan simbaan.
Sayan kiwawala na Katawan et mansiansia diad sayan abong na Dios. Agay lay liket tan mapalar tayo ran Katolikon mananisia ed say Masanton Eukaristia. Maliketket tayon manisia ya say kiwawala na Katawan mismo et wadia ed kapegleyan tayo. Diad sayan abong na Dios. Diad sayan simbaan.
Ontan la kasin nabibirbir tayo so kiwawala na Katawan ed sayan simbaan? ed sayan abong na Dios? Ontan met kasi ya nabibirbir tayo so pikakasakey tayo ed balang sinansakey no sikatayo so mimisa tan mankokomunyon?
Agagik, ira. Say tawag ed sikatayo natan et say pananisia tayo ed si Jesus a Tinapay na Bilay. Tan sayan Tinapay so kanen tayo unong ed say gangan na Katawan. Pian sikatayo naitday biskeg tan bilay. Pian sikatayo so mikasakey ed say totooy Dios. Pian naawat tayo so ag nasabsaban grasya na Katawan.
Ontan la komon. Amen.
