Si Jeremias so sakey a propitan tinawag na Dios ed panaon na kaugsan diad Israel. Ed saraman ya panaon, saray totooy Dios so unaarawi la rad Katawan. Kanian, imbaki na Dios si Jeremias ed Jerusalem. Imbaga toy salitay Dios ed sikara. Balet imbes na maliket dan inawat so ibabaga nen Jeremias, diman da pinairap, “niludlurey tan inelek-elekan da” ya anggad si Jeremias so manakis ed kairapan to. “Agko la nayarian, Katawan!” kuan nen Jeremias. “ Masyado layan kairapan. Agko la nayarian.”
Pamilyar yan liliknaen nen Jeremias para sikatayo.
Siopa ed sikatayo so agto ni akalikna na problema, sakit, kairapan ed bilay to? Siopa ed sikatayo so andi nin balot nanpaga? Nanaburido? Nanairapan ed nantutumboken a problema na bilay? Ya asabi-sabi panaon ya inkuan tayo ed say Katawan: “Masyado lay irap ko! Agko la nayarian!” Insan tayo tepeten ed say Dios ya onkekerew na paliwawa: “Akin et siak ni, Katawan?”
Akin et siak ni Katawan so mansasakit? Akin et siak ni ni maniirap ed sarayan agnasumsumpal a problema? Akin et aliwan samay kaabay mi? Akin et aliwan samay kabosol ko? AKIN ET SIAK NI?
Anto so kabaliksan to yan tepet?
No say kuan tayo ed say Katawan: Akin Katawan, siak ni? Aliling toy kekerewen tayo ed say Katawan ya agtayo kanepegan ya mansakit! Agtayo kanepegan so manproblema! Agtayo kanepegan so walad kairapan. Say ilalo tayo ya lanang: say bilay ya walad inawa tan ligliwa! Tan saya ingen so pirpirawat tayo ya lanang.
Ta say bilay na too et nantekepan na ligliwa, inawa, liket tan kairapan. Nen sikatayo so niyanak, tampol ya sikatayo so inmakis pian makasongap tayo na dagem pian sikatayo so nabilay! Onya so bilay tayo: natekepen so irap tan ligliwa, akis tan imis.
Mainomay ya natalusan so ligliwa tan inawa na bilay. Mainomay tayon naibaga ya tanday panangaro na Dios ed sikatayo iraya. Balet say irap tan krus ed bilay? Panangaro na Dios ni raya kasi?
Anggapo so awit kon malinew ya pangipatalus so kabaliksan na saray kairapan na bilay tayo. Balet, wala labat so naistoryak tan lapud saya, nabirbir tayo ya sarayan kairapan et walay kabaliksan to ed say pikakasakey tayo ed say Dios a Katawan.
Si Pope John Paul II nen sikato so apili ya magmaliw a Santo Papa nen 1978 et apanopanoy kabiskegan. Singa ag balot mansakit. Aktibo a pisikal a too! Balet abalang iyan amin nen 1981 nen sikato so pinaltog da. Nanlapud saman ya anggad inpatey nen Pope John Paul II ed sayan taon -- duamplo tan apat a taon, si John Paul II so nanirap ya maong. Nanengneng tayo ya nen 1981, ontan lad matek tan maksil tan malongob so panagsalita to. Nen sikato so inatey, agla natalusan so bosis da, abokot la tan mangiwgiw la. Ontan lan baleg so inpanirap na sayan Santo Papa tayo. Balet, diad kapegleyan na kairapan to, diman met alikna, abirbir tan aneng-neng so inkasanto to! Tan say kuan na dakerakel: lapud say kabaleg tan kabelat na inpanirap to, ontan la so inbiskeg na inkasanto!
Akin? Agtayon balot nangel ed si John Paull II so salitan: Akin et siak ni Katawan? Sayan Santo Papa met so tinawag a “Mercy Pope” lapud diad kapegleyan na kairapan to, diman to met inter so balbaleg a talek to ed say Panangasi na Katawan. Diad kairapan to, nalmo to so dalan ya mamaarap ed masanton panagbilay!
Sirin, diad kapegleyan na sarayan kairapan tan sakit tayo, say pikasi tayo aliwan say naekal ya amin so problema tayo, ta ag balot nasumpal itan ya kerew, no ingen say kerew tayo et say ibiskeg na panmatalek tayo ed say Panangasi na Katawan. Tan diad sayan panmamatalek tayo ed say Katawan, onaasinger tayo ed sikatayo. Diad satan ya iaasinger tayod Katawan, say kasantosan a manlalapud Dios so onbulaslas ed sikatayo. Tan anggan antoy onsabi, walay inawan naiter na Katawan ed sikatayo. Agtayo manbobokbokor. Kaiba tayo so Sankasantosan tan Sankamapangasian a Dios.
Itilan manmatalek ed say Panangasi to. Ontan la komon.
