Wala ra so panaon ya asabid bilay tayo nen sikatayo so walad abebeba ya kipapasen, lapud kairapan, kaermenan, a singa anggapo la so nagawaan, anggapo la so ilalo, tan sipaparaan tayo lan “man-surrender”. Diad sarayan kipapasen, naalmo tayo komun so kabiskegan na pananisia tayo a manlalapud say Katawan.
Diad say ibanghilyo tayo, nadngelan tayo no panon a nan-akar so Katawan ed danum, tan no pano ya inkerew met nen Pedro ya manakar met ed danum. “Gala!” kuay Katawan. Balet nen manaakar lad danum si Pedro, ataktakot ed kabaleg na daluyon, kanyan sikato so nalelegep. Siningkat na Katawan tan inlaban tod patey.
Diad kultura na totoo nen saman, say dayat so pasen na kaugsan, say panarian na patey ya manataktakot ed amin a totoo. Kanian, nen si Jesus so “nanakar ed danum”, ibabaga na Katawan ya tinalo to la so kaugsan tan say pakapanyari ran manederal ed say too.
Ag naandi iray bagyo ed bilay tayo. Bagyo na problema, saray dakerakel ya panpapagaan tayo, saray pakatatakotan tayo, problema ed pamilya, diad trabaho, diad inagey-agew ya bilay tayo. Balet, diad sarayan kapegleyan na amin walay Jesus ya inpanengneng to para sikatayo ya tinalo to irayan amin ya bagyo tan kasil na dagem ed bilay tayo nen sikato so “nanakar ed danum”.
Diad inpanawag nen Jesus ed si Pedro ya manakar met ed danum, ipapanengneng nen Jesus ya walay pakapanyari nen Pedro ya taloen tan saragen irayan amin ya problema. Ag ira naandi ed bilay, balet saraya et naitdan na balon kabaliksan diad panamegley na Katawan.
Akin balet et nalelegep si Pedro nen sikato so manaakar ed danum. Say twa et ag linmad danum si Pedro no ag tinawag na Katawan. Sayan tawag na Katawan et sakey ya sipan ya diad kapegleyan na sarayan dagem tan bagyo na bilay, kaiba tayo si Jesus tan ag-mapaga ta anggapo so pakayari da iraya ed saray kaugsan.
Kanian, no tepeten tayo: akin et nalelegep si Pedro nen sikato so manaakar la ed danum? Say ebat. Lapud, imbes na si Jesus so nengnengen to, say ninengneng to et say daluyen na dayat tan kasil na dagem. Nakal so linawa to. Nakal so sebeg to. Nakal so biskeg na pananisia to ed say Katawan. Tan ataktakot. Say takot et kabaliksan na kakulangan na talek ed say Dios.
Balet, agitayo paolyan na Katawan anggaman no maminsan naekalan tayo na ilalo tan talek ed sikato. Tinmawag si Pedro ed si Jesus: “Katawan, ilaban yo ak!” Tan inyonat nen Jesus so taklay to tan inagwat toy Pedro.
Ag itayo paolyan na Katawan ya nalegep ed kaugsan, kairapan, kaermenan tan kasalanan. No singa tayo si Pedro ya onkerew na panangasi ed Katawan. Onkerew na grasya na Katawan. Say inpag-awat na Katawan et aliling toy grasya na panamerdona, grasya na pananisia, grasya na ilalo ya nakaukolan tayo ed kapegleyan na saray bagyo na bilay tayo.
Kanian, diad bilay tayo: siopa so sankanengneng tayo ya lanang? No nabebelatan tayo ed saray kasalanan tan kaugsan ed bilay tayo, aaboloyan tayo kasi so Katawan ya agwaten to itayo? Si Jesus so mapangasin Manangilaban tayo, anggapo lay arum ya anapen tayo. Ontan pa komon. Amen.
