Say ebat nen Pedro ed samay tepet nen Jesus: Siopa ak ed para sikayo? makabaliksan ed si Pedro tan saray kapara ton disipulo nen Jesus. Sikato so sentro na say pananisia nen Pedro ed si Jesus.
Si Jesus so Kristo, Anak na Dios!
Say salitan “Kristo” so salitay Griego ya say kabaliksan to ed Hebrew et “Messias” odino samay alagden na saray Judio ya apilin Manangilaban! Kanian nen inbalikas nen Pedro a si Jesus et sikato so Kristo, say Messiah, bibirbiren to ya si Jesus et Dios, tan sikato so alagdan da lan abayag ya Manangialaban.
Tan lapud sikatayo so sakey a disipulo nen Jesus a Kristo ontan met so pananisia tayo nipaakar ed si Jesus. Sikato so Kristo tayo, say saksakey a Manangilaban tayo, saksakey a Katawan tayo!
Kasumpal ya inbalikas yan pananisia nen Pedro ed si Jesus, anggaman dakel ni kakulangan nen Pedro, ya singa bilbilang et inkaindan ton amitlo, diad sampot, anggapo lay arum ya tinumbok to ya anggad patey, tan anggapo lay arum ya binirbir ton manangilaban to no ingen et si Jesus labat.
Kanian, no bibirbiren tayo ya si Jesus so Kristo ya Anak na Dios, sikato labat, anggapo lay arum, so anapen tayon sirin a Manangilaban tayo. Diad irap tan gonigon tayo, diad saray dakerakel ya pirpirawat, diad anapen tayon aliguas tan kareenan na bilay tayo, anggapo lay arum ya nakaukolan tayo no ag ingen et si Jesus a Kristo, say Manangilaban tayo.
Ilaban to itayo ed saray kairapan tayo; ilaban to itayo ed saray sakit tayo; ilaban to itayo ed saray bakal, tan guloy mundon nanaimatonan tayo; ilaban to itayo ed amin ya kaugsan ya walad kaliber-liber tayo; ilaban to itayo ed anton kasalanan ya walad sikatayo tan diad bilay tayo!
Walay sakey ya Drugstore ya say naynay ton ibabaga: "Nakasisiguro gamot ay laging bago!" Ibabalikas ton SIGURADO ya say tambal da et balon amin. Ontan met ya tua so anapen tayo, say PAKASIGURADOAN tayo. Sigurista tayon amin.
Say tua ontan met komon so pananisia tayo ed si Jesus! Diad si Jesus, akasiguro tayo ed amin. Anggapoy kakanaan na saray anting-anting tayo; anggapoy kabaliksan na swerten numero; say ibabagay horoscope; anggapo so maong tan makapoy ya agew. Anggapoy pakapanyari na andeket ya pusa, polka dots ya kawes, no ikumpara irayan say amta tayon mangilaban tan mangiter na “swerte” ed sikatayo ed si Jesus a bokor to so Kristo tan Manangilaban tayo!
Kanian, no anapen tayo so sigurado, dia tayo la ed si Kristo, ya Anak na Dios ya Manangilaban tayo. Ontan la komon.
