"Mabisbiskeg so pananisiam! Nagaway kekerewen mo."
Say Ibanghilyo tayo nipaakar ed say sakey ya biin taga Canaan onkekerew na panangasi ed say Katawan lapud samay anak to so mansasakit. Anggaman, diad gapu ag inasikaso na saray apostol na Katawan, tan say Katawan mismo, sayan bii, ag tinmonda ya maneyag ya manpipikasi ed say Katawan. Diad sampot, say pikakasi so dinengel na Katawan. "Mabisbiskeg so pananisiam! Nagaway kekerewen mo”, inkuay Katawan ed sikato.
Agay lay palar to yan bii, kuantayo. Say pikakasi to so dinengel na Katawan. Akin et siak, ey? tepet tayo ya mabetbet. Akin et saray pikakasi tayo et ag iraya lanang ya nanaawat tayo? Aliwan tampol no maminsan, a singa samay bii ed ibanghilyo?
Lapud kasi aliwa tayo maaro ya maong, odino aliwa tayon mapaabeba, odino melmelag so pananisia tayo?
No maminsan, saraya so rason. Odino, no maminsan onaasingger tayo ed say Katawan tan ialiling tayon singa griepo so Dios: no labay tayon walay danum, ilukas labat so griepo, tan tampol ya walay danum ya onagos. Anggan anton panaon, anggan anton rason, anggan anton kipapasen.
Balet, no maminsan et ilukas tayo so griepo tan anggapo so danum ya pinmaway, manpasnok tayo. Maningongot tayo. Tan say kuan tayo ya man-complain: manbabayar ak met? odino, inpeyes ko met?
Kanian, say amta tayo no mandasal tayo na Ave Maria, Ama mi tan ontalikor, mimisa odino man-novena, iter na Dios so exacto ya kekerewen tayo: no antoman, no kapigan, no anton panaon.
No aliwan saman so nagawa, a say twa et mabetbet, naekalan tayo na ilalo. Ombarong tayo ed Dios. Insan, nagonoyan agtayo la mandasal. Mananap la na arum ya piolopan.
Balet, andi komon.
Ta say twa, say Dios eebatan ton balang sinansakey so pikakasi tayo, lapud sikato so twan maaron Ama. Aman mabonlok, aliwan masiblet. Aman say pankamungan na anak to so walad puso to ya lanang.
Tan onya so ebat na Dios ed amin ya pikakasi tayo: Onebat na tampol ya ON ed dasal tayo. Odino, aliwa nin natan, manalagar kan apanoy ilalo. Tan, andi ed satay kerew mo balet walay mas maong ya iter kod sika. Ta say Dios amta to no anto so nakaukolan tayo tan say pankamongan tayo.
No agtayo naawat ya tampol odino agtayo naawat so pikakasi tayo, ag labay ton ibaga ya say Dios et agto dedengelen so dasal tayo. Say labay ton ibaga et walay plano na Dios ya iter ed sikatayo ya mas maong nen samay kekerewen tayo.
Ta say Dios et aliwan singa griepo, no ingen sakey ya makabat, maaro tan mapangasin Ama. Ontan pa komon. Amen.
