"Siak so dalan, say katwaan, tan say bilay; anggapoy toon makaonlad Ama no ag diad panamegley ko.” Nen manpaparaan ed para sayan homily, walay nan-text ed siak ya mansampot la kuno so mundo – nen karuman. Kanian, ag ak sigurado no gawaen ko ni yan homily odino alagaren ko lan natunaw so mundo.
Lapud wadia kayon ondedengel ed say homily ya iiter ko et sasakey so kabaliksan to ya: aliwa nin end of the world. Samay angibaga et matila. Tan sikatayo so atilaan. Agto inbaga so katwaan.
Lapud saya, dakel ed sikatayo so agonigon, mapag-papaga. Ataktakot. Lapu labat walay sakey ya pastor ya angibagay aliwan katwaan.
Onya so bunga tan epekto na tila. No aliwan katwaan so panlalapuan na pundasyon tan lamot na kipapasen tayod panagbilay.
No anggapo tayod katwaan – anggapo so kareenan na kanunutan tayo. No anggapo tayod katwaan, mainomay ya naderal so pananisia, kaoksoyan na bilay anggan say ilalo tayod bilay. Walay ingen so pagpaga, pakatatakot, dakel ya pakaka-gonigon.
Imbaga na Katawan tayo ed say ibanghilyo tayo: "Siak so dalan, say katwaan, tan say bilay; anggapoy toon makaonlad Ama no ag diad panamegley ko.”
Anto so katwaan ed saray nanduroman disasters, yeg-yeg, tsunami. Dakerakel ya totoon naandi ed bilay? Mapasnok so Dios?
Anto so katwaan nipaakar ed saray ag napolpoltot ya onsasabin problema anggaman sikatayo so dasal-lan dasal. Tan anggapo met so amta tayon gagawaen tayon mauges? Say Dios kasi et maruksa?
Anto so katwaan ed ikakayat na saray kaugsan ed kaliber-liber tayo? Say Dios et anggapo so pibabali to? Labay tayon naamtaan so katwaan!
"Siak so dalan, say katwaan, tan say bilay; anggapoy toon makaonlad Ama no ag diad panamegley ko.” No wala ra so problema tayo, sikatayo so mandasal ed say Dios a Katawan. Tan onya so dasal tayo: “Katawan, itorum ed siak no anto so gawaen ko.” No wala ra so pakakaermenan tayo, say dasal tayo so onya met: “O Katawan, ipapaneng-neng mod siak so ligliwa na bilay.” No sikatayo so mansasakit, say kuan tayo ed say Katawan, “O Katawan, iyarawi mo ak ed kairapan tan iter mod siak so kaabigay bilay.”
"Siak so dalan, say katwaan, tan say bilay; anggapoy toon makaonlad Ama no ag diad panamegley ko.”
Aliwan amin et natalusan tayo. Aliwan amin et malinew tayon nakabatan. Aliwan amin et naitdan tayo na kabaliksan. Balet, lapud pananisia tayo ed say Katawan tayon Jesukristo ya angibagad sikatayo ya "Sikato so dalan, say katwaan, tan say bilay”, walay kabiskegan, ilalo tan ligliwa na bilay tayo. Aliwan lapud amta tayo so dalan, natatalusan tayon malinew so katwaan, nalmo tayo so bilay ya maliket. Andi. Wala irayad sikatayo, lapud wala si Kristo ed sikatayo. Lapud kabat, nabet tan inawat tayo si Kristo ed bilay tayo.
Si Jesus so dalan. Say dalan na panangaro tan panangasi lapud si Kristo so panangasi tan panangaro mismo.
Si Jesus so katwaan. Say panbilay ed say ganggan, bangat na Katawan unong ed say Ibanghilyo, say integridad na pananisia tan say panag-bilay. Si Jesus et saksakey: no anto so imbaga to, sikato so bilay to, tan saman so pansumpalan to. Nangel ko so ebat na sakey ya Kongresista diad debate na RH Bill ed kongreso nen Martes. Say kuanto: “I am a congressman who is a Catholic, but I am not a Catholic Congressman”. Nakar so katwaan na panagbilay ya walad integridad unong ed say pananisia tan say panag-bilay unong ed saman a pananisa? Ta sya twa, no Katoliko tayo, anggan iner, anggan kapigan anggan Congressman odino teacher tayo man, Katoliko tayo ni ya siansia.
Si Jesus so bilay. No arawi tayod si Jesus, anto so kabaliksan na bilay tayod kabiskegan, pakapanyari odino kayamanan? No anggapo so Katawan ed sikatayo, anto ni so kakanaan na amin?
Lapud inako tan manisia tayo, walay panagmatalek tayo ed si Jesus ya Katawan tayo. Tan no sikatayo sirin so nababalang, mapagpaga tan nanaekalay ilalo, diad si Kriston Katawan tayo labat naalmo so “dalan, katwaan tan bilay”. Anggapo lay arum. Ontan pa komon. Amen.
