Inkuanen Jesus, "Ag ta ka met dusaen. Ag ka lan balut sirin mankakasalanan."
Diad say inagew-agew ya experience tayo, onya so ilaloan tayon lanang nipaakar ed saray kasalanan tayo: no walay agawan kasalanan, walay kabaliksan ton dusa. Sayan dusa baleet et man-depende no panoy kabelat odino kamelag na kasalanan. Diad abong no binagaan you ogaw o samay apo ya agto diwiten so baso ampan napisit to, et siansia nin diniwit to, diad in kaawet na ulo to, sikato so innarot, o nilewet ingen, ya kaibay tami.
Anto so kabaliksan na kasalanan? Say kasalanan et offense, sakey ya gaway too sumlang ed Dios. Say kasalanan et sumlang ed panangaro na Dios tan iyaarawi toy puso tayo ed sayan panangaro.
Nen narel na saray Phariseo imay biib ya mikakaloguran, sakey ya ambelat ya kasalanan, labat dan tampol ya dusaen, tan say dusa, unong ed si Moises et patey! Topaken anggad sikato so ompatey! Sayan bii so inyarap dad si Jesus. Tan alagaren da no anto so gawaen to.
"Ag ta ka met dusaen. Ag ka lan balut sirin mankakasalanan."
Inararo na Dios so mundo kanian imbaki to so bogtong ya Anak to, aliwan pian dusaen to, no ingen, pian ilaban to ed kasalanan.
Say Dios tayo et aliwan maruksa; say Dios aliwan mapasnok. Say Dios tayo apanoy panangasi ed sikatayo ran makasalanan. Say tatawagen tayon "dusa", para say Dios, "kablit na panangaro", pian sikatayo so manpataoli, ompawil ed sikato, tan benegan tayo so kasalanan.
Lapud say twa, no tumboken tayo so kagagawa tayon lanang, tampol ya walay dusan iter tayo ed kada kasalanan. Say twa met, lapud kada kasalanan et sumlang ed Dios, say dusa tayo, lapud say Dios so apasakitan, et patey! Balet, aliwan dusa, no ingen panangasi so iiter na Dios ed sikatayo, anggan maminpiga-piga tayon mankasalanan.
Ta say Dios, Dios ya mangiiter na agnapolpoltot ya "chances" para sikatayo. Tan sayan chances, tatawagen tayon panangasi, panamerdona na Dios. Kablit na panangaro tan panangasi na Dios. Tan no kabliten itayo na Dios, no maminsan sikatayo so mansakit, sikatayo so onlad kairapan, kablit na panangaro na Dios, a singa pankarot na ina, pian manpataoli tayod kasalanan tayo, tan arawian so kasalanan.
"Ag ta ka met dusaen. Ag ka lan balut sirin mankakasalanan."
Say kanepegan tayo et dusa lapud kasalanan tayo. Balet, panangasi so iiter tan iyaawat na Dios ed sikatayo. Agtayo makanan ed sayan panangasi tan panamerdona na Katawan, balet awaten tayo, tan iter tayo so panagmatalek tayo ed sikato. Tan komon, walad sikatayo so katooran ed say panangasi na Dios ed bilay tayo.
"Ag ta ka met dusaen. Ag ka lan balut sirin mankakasalanan." Ontan pa komon. Amen.
