Wala ray pigaran totoo ya angibalitad si Jesus ya wala ray pigaran pinatey nen Pilato a taga Galilea. Ontan met, atongtong dad si Jesus no panon ya walay labin-walo ya totoon apataan na aderal ya tore.
Say populat ya opinyon na totoo ed saraman ya panaon no panon ya say kairapan na sakey a too et lapud say personal ya kasalanan da. Kanian sirin, lapud sayan opinyon, saraman ya totoon taga Galilea tan saramay totoon inatey lapud sikaray apataan ed lapud wala ray angkakabaleg ya kasalanan da.
Ag sirin manarawian so totoo nen saman tan ed sarayan panaon. Ta mabetbet ya narerengel ko no walay sakey ya toon bantog ya dakerakel so bisyo to tan sikato so abalitaan ya mansasakit odino sikato la so angorat, say kuan tayon tampol: Gungona to. Atan et, makasalanan kanian sikato so adusa.
Antoy ebat nen Jesus ed sarayan opinyon na totoo nen saman tan natan: ya say kipapasen na too ya walad kairapan et lapud walay baleg ya kasalanan da, kanian sikara so dudusaen na Dios lapud wala ra ed kasalanan!
Say ebat na Katawan: No agkayo mabanbawi ed kasalanan yo, ompatey kayo a singa saramay apataan odino pinatey nen Pilato.
Ed sayan ebat nen Katawan, onya so bangat to: siopaman sirin so agto manbabawi ed saray kasalanan to magmaliw lan nisian diad andi-anggaan ed say Dios. Tan no sikara so ompatey ya ag manbabawi, sikara so walad patey ya andi-anggaan!
Lapud saya, onya so agtayo komon lingwanan:
Unaan, amin tayo et makasalanan. Tan sikatayo so mankakasalanan ni anggad natan.
Kumadwa,balet anggaman sikatayo so makasalanan, sikatayo so inararo ni na Dios! Makapakelaw balet saya so katwaan. Ta say rason no akin et say Anak na Dios so nagmaliw ya too? Lapud panangaro. Inararo to itayon makasalanan, nagmaliw ya too pian ilaban to itayod kasalanan, aliwan dusaen to itayo. Sayan panangaro na Dios et agto labay ya sikatayo so ompatey ed kasalanan.
Kumatlo, sirin, aliwan diad kasalanan so pansampotan tayo komon, no ingen diad grasia tan panangasi na Katawan. Nepeg ya sikatayo so manpataoli ed saray kasalanan tayo. Ta lapud say Dios et lawas a sipaparaan ya perdonaen to itayo, no onkerew tayo na panangasi to.
Tan kapigan yan panbabawi tan pankerew na panangasi na Dios? Natan la. Aliwan naani. Aliwan nabawas. Aliwan no kuaresma. Natan la.
Say panangasi na Dios ed mabolos ya iter na Dios ed sikatayo no amta tayon onkerew ed saya. Balet, mabetbet ya ibabaga ya singa amta tayo no anto so peteg ya nagawa ed sikato: Mabayag ni so bilay ko. Agak ni naandid bilay. Tan sirin, anggan manalagar ni so panpataolik, tan panpasimbalo na bilay ko.
Nen apataan ira may labin-walo diad istorya na ibanghilyo, amta da kasi ya saman la so ipatey da? Nen impapatey ira nen Pilato, amta da kasi ya sampot dalaman ya oras? Akapan-pataoli kasi ed kasalanan da?
Para say Dios, anggaman anton kabaleg so kasalanan tayo, no amta tayon onkerew na pananagasi to, naawat tayo yan panangasi, tan naperdona so kasalanan tayo.
Kapigan kayo ni sampot ya nan-kompisar? Kapigan yo ni naawat so bendision na parin pakapirdona na Dios ed saray kasalanan tayo?
Mandadasal kayo kasi ya no nasabi pakaandi tayod bilay et saya so "maliket ya ipapatey" odino happy death? Ya sikatayo so ompatey ya walad grasya tan panangasi na Katawan lapud kinmerew tayo na sayan mapangasin panamerdona na Dios?
Nepeg sirin ya manbibilay tayo komon ya kaiban lanang so Dios. Ta lapud say sampot tay et onsabi, anggad kapigan. Ontan pa komon. Amen.
