"Anggapoy propitan naawat ed dilin baley to."
Si Jesus a propitan linman binmisita tan nanbangat ed binalegan ton baley diad Nazareth. Anggaman anggapod sayan ibanghilyo ya abasa tayo no anto so inbangat nen Jesus ed saray kabaleyan to, sarag tayon naibaga ya akapasnok irad sikato lapud say nangel dad sikato. Kanian, labay da ingen ya pateyen si Jesus!
Amta nen Jesus no anto so arapen na sakey ya propita. Ngal-ngali anggapo so propita ya ag pina-irap, tan binosol na totoo; nabilang so propita ya inako tan inawat ya mabolos na totoo lapud say bangat to.
Say propita so imbaki na Dios pian ibalikas to so kaabigan na Dios. Ibalikas tod totoo so linawa tan say labay na Dios. Ibalikas to so katwaan, say katunongan, say panangasikaso tan panangarod kapara. Tan saraya et ibalikas na propita anggaman elekan tan bosolen na totoo. Ya anggad pateyen da, tan sibobolos ton iter so bilay to!
Onya so kairapan nen Jeremias ya propita. Agto labay so magmaliw ya propita ta amta to no anto so arapen na propita. Nan-anap na rason pian sikato et ag tawagen na Dios ya magmaliw ya propita to. Diad sampot, lapud tinoor to so tawag na Dios, masyadon pairap so inyawat na totoo ed sikato ya anggad sikato so pinatey da!
Anggaman ontan, say Dios agto ontotondan manatawag ya magmaliw ya propita to.
Nakaukolan so bosis na say propita ed mundon apanoy kaugsan!
Ta say tua, anggad walay kaugsan ed mundo, nakaukolan tayo so mensahe na kamaungan a manlalapud bosis na propita. Anggad walay tilaan tan saolan, say bosis na katwaan tan katunongan na propita so ibelyaw to. Anggad itoltoloy tayo so panlalames tan panbobosol ed saray kapara tayo, say bosis na propita ya mangibabawag na kareenan tan pankakasakey so ag ontondad kapegleyan tayo.
Nasabi-sabi komon ya anggapo la so pankaukolan tayo na propita ed kapegleyan tayo lapud say katwaan, say kaabigan, katunongan, panangaro tan kareenan so wala lad kapegleyan tayo.
Balet, say pikakasi tayo et sikatayo so naitdan na panangaro na Dios anggaman sikatayo et benegan na totoo lapud say katwaan ya ibabaga tayo. Naitdan tayo komon na biskeg ed saray kipapasen ya sikatayo so eelek-elekan na kaugsan lapud say panlalaban tayo ed sikara. Magmaliw tayo komon a liwawa ed mundon walad kabilongetan na kaugsan. Sakey ya propitan walay seet tan seseg, biskeg tan panangaro ya ibawag to so kaabigan, kamaungan, katunongan tan pankakasakey na Dios ed amin ya pinalsa to. Ontan la komon. Amen.
