"Sikato yay Anak ko a pinilik. Dengel kayod sikato!"
Nen nansalat na nengneng so Katawan ed arap di Pedro, Juan tan si Santiago, masaydoy takot darayan disipulo to. Tan diad sayan kapegleyan na takot da, sakey a bosis so nangel da, ""Sikato yay Anak ko a pinilik. Dengel kayod sikato!"
Dengel kayod sikato! Akin et onya so inbalikas tan ganggan na Ama?
Twa, narerengel tayo so bosis na Katawan tayon Jesu Cristo -- diad Masanton Sulat, diad pimimisa tayo, diad saray bangat na Simbaan, tan diad konsiensya tayo. Balet, twa met kasin dedengelen tayo?
"Sikato yay Anak ko a pinilik. Dengel kayod sikato!"
Pirpirawat tayo so walad bilay ya ligliwa tan inawa ya lanang. Tan gagawaen tayoy nayarian tayo pian nagamuran tayo ya: say mankimey ya piga-pigan oras, say manseet ed saray gagawaen tayo; say man-tipid, say man-negosyo. Balet, ed sarayan gagawaen tayo, nararerengel tayo kasi bosis na Katawan, tan totooren tayo?
Dengel kayod sikato!
No walaray desisyon ya nepeg tayon gawaen, dedengelen tayo kasi so ibabaga na Katawan, tan tepeten ed dili tayo no anto so gawaen na Katawan ed say kipapasen tayo?
No sikatayo so walad tukso ya mantila, mansaol, man-labir ed arum odino mantakew, tetepeten tayod dili tayo ni no anto so labay na Katawan ya gawaen tayo?
Labalabay tayon say pamilya tayo et walan lanang ed kamaungan, say aliguas na bilay tan say ligliwa na amin a kabiangan na pamilya tayo. Balet dedengelen tayo so Katawan no sikatayo la so makakapasnok tan onbabarong ed sakey ya agi o say kanayon? Dedengelen tayo so bangat na Katawan nipaakar ed say panamerdona tan panangasi? Anto so gawaen ed agin mabetbet ya mangiiter na sakit na ulo ed sikayo? Sakbay ya mangawa na desisyon, dengelen so istorya na Katawan ed samay Prodigal Son.
Say kogkogipen tayon lanang et say bansa tan say baley tan diad kaliber-liber tayo et walay kareenan, walay aliguas, walay pankaksakey, walay kamaungan, tan arawi so kaugsan, bisyo tan arum niran mangiiter na pagpaga tan takot ed sikatayo. Diad saraya, dedenglen tayo kasi so Katawan? Say bosis na kasibletan tan say bosis na imonan so maksil nen say bosis na aroan, pantutulongan tan panangasikaso ed kapara.
Say twa, no peteg tan maseet tayon dengelen so bosis na Katawan, tan saraya et tooren tayo, agaylay abig na mundo tayo. Agaylay dakep na ulopan na pamilya tayo. Agaylay liket tayo diad maaro tan mapangasi, manbonlok tan mapaabeban bilay a kaiba ray kaparan ondedengel tan totooren so bosis na Katawan. Ontan pa komun. Amen.
