Nen inbeneg ya Huwebes, maliket tayon inawat so dakerakel ya agagi tayod arum a parokia na Arkidiosis tayo ya inpangulo di Archbishop ya kaiba ra so papari. Say okasyon: say pangigapo na pampaalagey na pilalek tayon Seminario na Theology na Archdiocese tayo.
Kada misa, kekerewen tayon say Dios et bendisionan to yan pilalek tayo. Tan manpipikasi tayo ya nasumpal iyan pilalek tayo: unong ed say bendision tan linawa na Dios, tan unong ed sikatayo ran totoo to. Say dasal tayo: Usar Yo ak pian nasumpal iya.
Diad sayan ibanghilyo tayo, nangelan tayo no panon ya say sakey ya paralitiko et nilibit na saray kakaaro to ya inawit dad si Jesus. Binongaw da so atep ya walad petek nen Jesus. Diad sampot, pinaabig na Katawan iyan paralitiko. Lapud anengneng to so pananisia ra: say pananisia na sarayan apatiran kakaaro na sayan paralitiko.
Sarayan kakaaro et pilalek dan onabig so kaaro da. Manisia ra ya walad si Jesus so pakasumpal na sayan pilalek da. Balet, manisia met ira ya anggapo so pansumpalan to yan pilalek da no sikara mismo et anggapo so sakripisyo, no anggapo so naiter da para sayan pilalek da para samay kaaro ra.
Abirbir nen Jesus iyan mabilay ya paninisa ra. Tan inter to so pakasumpal na pilalek da.
Nen apalabas ya taon, ontan lan say pilalaek tayo et naapiger tayo so retablo tayo. Manisia tayon say Dios et iter to yan pakasumpal na pilalek tayo. Balet, manisia tayo met ya ag nasumpal iya, no anggapo so manlapud sikatayo. Nansakripisyo tayo. Akikasakey tayo. Angiter tayo. Tan natan, say Dios inter to so bendision to ed sayan pilalek tayo. Wadia natan ya akaalagey so agaylay dakep ya retablo tayo. Retablo na pisasalamat tayo ed say Dios ed say agnasabaan ya bendision to ed sikatayo.
Walay pilalek na Arkidiosis tayon manpaalagey na Theology Seminary. Tan kada misa say dasal tayo: “Bendisionan Yo iyan pilalek mi ya sakey a seminario na theology para say Simbaan na Lingayen-Dagupan.” Pian nasumpal iyan: say sipan tayo ed say Katawan: “Isipan ko ya mangipireg ak ed inagew-agew a kantidad para say seminario.”
Agagik ira: Tatawagen ko so amin ya pamilya tayod diad San Fabian ya mikasakey pian nasumpal iyan pilalek tayon seminario. Manlapud sayan arapen na Ash Wednesday, ya anggad Agew na Pentecostes no 27 Mayo, kekerewen ko ya itdan tayo na bilay tan katwaan, laman tan katooran so dadasalen tayo para say Theology Seminario: Mangipireg kayo ed inagew-agew a kantidad para say seminario. Ed sayan taloy bulan, no say sakey ya pamilya, say ama tan say ina, tan saray anak da, et makapangipireg ira na anggan P12.00 ed kada agew, walay natipon dan masulok ya P1,000.00 la.
Tan, amta tayo no sayan sanlibo ya kantidad et mikasakey ed sanlibon nin arum ya pamilya diad San Fabian, walay sakey ya milyon ya naiter tayo para say seminario ya ingaran ed si Mama Mary: kanian, 1 M para kay M…. M para kay Maria.
Say kerew ko labat: no manpapaknaan kayo ran miembro na pamilya, say ama, tan say ina, tan saray anak, ya mangipireg ed inagew-agew, ipireg la diad kabwasan. Antes ya sikatayo so onlan mankimey, ondago, onpasyar, o manakar-akar. Pian ontan, amta tayo la no anto so naiter tayon sakripisyo para si Mama Mary. No inpireg yo so P20.00, amta yo lan bawasan yo so tinapay ya kanen yo, odino say sigarilyoen yo, odino say padyak ya luganan yo.
Diad sayan arapen ya Cuaresma, komon saray pamilya tayo so mikasakey para si Maria. Families for Mary. Say sakrisyon ipireg ed kada kabwasan na inagew-agew, ed pakanengnengan iya na mabilay ya pananisia tayo, singa samay mabilay a pananisia na saramay apatiran mankakaaro. Ya diad sampot, sayan pilalek tayo et bendisionan na Dios, tan diad isabi na Golden Anniverary na Archdiocese tayo, wadman lad Palapad so seminarion akaalagey.
Ontan pa komon. Amen.
