Si Juan Bautista so abitlad ibanghilyo ya sikasto so managpulong; say ibaki na Katawan ya onona a mangiparaay dalanen to. Si Juan so apili tan naibaki ya mangiparaan ed say dalanen na Katawan diad isabi to.
Onya so mensahe na Adbiento ed sikatayo. Onsabi so Katawan. Manparaan tayo ed sayan isabi to. Say tepet labat balet: panon tayon iparaan so isabi na Katawan? Tan panon tayon iparaan iyan dalan to?
Say Katawan onsabi lan lamang tan iletneg to so panarian to. Tan sayan panarian et panarian na kareenan, katunongan tan kareenan. Panangaro, grasya tan kasantosan. Sikato ya iletneg to aliwa labat diad kapusoan na amin ya mangawat tan manisia ed sikato no ingen lukasan to yan balon bilay para say sansinakuban. Lapud si Kristo so kareenan mismo, sikatoy katunongan tan panangasi, panangaro tan ligliwa.
Diad sayan panaon na Adbiento na panparaan na isabi na Katawan, ontan lan say dalan na Katawan so apigeren tan iparaan tayo. Ta lapud, no tuan bibirbiren tayon Dios tan Manangilaban tayo si Jesukristo, sayan dalan so nepeg sirin ya makana tan makabaliksan para sikato tan para sikatayo met.
Sayan dalan et anggapoy arum no say dalan ya mamaarap ed kapusoan tayo. Sayan dalan et sikato met so mamaarap diad komunidad tayon panayaman na Katawan. Diad puso tayon balang sinansakey tan say puso na ulopan tayon diad kapegleyan manayam so Katawan.
Itila sirin ya birbiren so katwaan na kipapasan na sayan dalan a mamaarap ed kapusoan tayon dili tan diad kapegleyan na say ulopan tayon o diad komunidad tayo. Say tua et sayan dalan et apanoy tibagkol tan abot, dutak tan pitek, aliwan patag tan aliwan malinis. Apanoy bosolan, imonan, siblet tan agom. Kulang na pananisia. Apanoy dutak na laman: bisyo tan kaugsan. Tilaan. Saolan. Kulang na talek ed say panangasi na Dios. Kulang na aro tan panasikaso ed kaparan too. Sirin, aliwan dalan ya makana tan malinis para say Katawan no sikato so onsabi.
Say inkuan nen Juan Bautista:" "Magbabawi kayod saray kasalanan yo tan mampabinyag kayo, et say Dios pirdonaen to kayo." Pian sayan dalan et nalinisan. Say kerew nen Propitan Juan Bautista: PANAGBABAWI. Birbiren tayo irayan kakulangan tan kasalanan tayo ed say Dios a Katawan tan saray kapara tayo. Panagbabawi. Panagbabawi ed say anggapoy pibabali tayod saray nagagawan kairapan na arum; basta agtayo nadistorbo ed makutenton bilay tayo, iletdem tayo lay mata tan puso tayo ed say kerew na tulong ya nayarian tayon iter. Panagbabawi ed say agtayo panbabangat ed saray anak tayo. Say pangipapaneng na aliwan kagagawa: say panagtila tan panagtakew. Gagawaen tayo la lapud nagagamuran tayo labat so pirpirawat tayon kayamanan tan posisyon. Panagbabawi ed saray andi panagasikaso ed saray ilog, palandey tayo. Ed saray basuran ibabantak tayod kaliber-liber tayo. Basuran ibabantak tan basuran immoralidad diad salita tan gawa. Panagbabawi tayo ed say agom tayo. Say panagbosol tayo. Say inpakaindan tayo ed say Dios tan saray samploran ganggan to. Lapud saraya et sumlang ed say labay tayon bilay.
Panagbabawi ed sarayan amin. Tan ontan lan napatas tan nalinisan iyan dalan na Katawan ed say isabi to. Diad puso tayo. Diad kapegleyan na kumonidad tayo.
Nasumpal tayo iraya no dengelen tayo so bosis na Simbaan ya mangibebelyaw no panon tayon ibilay so tuan tawag na Katawan. Tawag ya manbilay unong ed katunongan, panangaro tan kareenan. Pikakasakey ed kapara. Panagasikaso ed saray mankakaukolan. Naalmo iraya diad saray doktrina na Simbaan nipaakar ed say responsibilidad na balang Kristiano ed sikato, kapara to tan diad komunidad na kawalaan to. Saraya so Social Doctrines na Simbaan.
Diad panpaparaan tayo diad sayan panaon na Adbiento, ontan la sirin ya mutektekan tayo irayan doktrina na Simbaan. Aralen tayo. Mutekteken tayo. Ibilay tayo.
Ontan la komon.
