Say kumatlon simba na adbiento et tatawagen na GAUDETE Sunday. Say salitan “Gaudete” et nanlapud salita a Latin tan say kabaliksan to et “Mangayaga” tan sikato ya so unaan ya akasulat ed misa tayo: “Mangayaga kayo ed Katawan!”. Sikato met so rason no akin et say kolor na “Parol na Halina” tayo et pink odino singa kolor na rosas. Kolor iya na panag-gayaga.
Akin et diad sayan kumatlon simba na say panaalagar ed say isabi na Manangilaban et simba na gayaga? Akin et walay gayaga diad panpaparaan tayo na isabi na Katawan a Manangilaban tayo?
Diad ibanghilyo nangelan tayo si Juan Bautista. Unong ed sikato nen tinepet na saray Pariseo no siopa, say inkuanto: , "Siak imay sinalita nen propita Isaias nen kuanto, 'Siak so bosis a mambabandod kalawakan. Apiger yoy panakaran na Katawan!” Si Juan so mangipaparaan na dalan na isabi na Manangilaban. Si Juan so bosis labat, balet walad sikato so magayagan bosis. Ta amta nen Juan so katwaan tan say pete-peteg ya isabi na say Manangilaban. Walad si Juan so bosis ya walay gayaga lapud say ibabando to iyan bosis et say bokbokor, tan anggapo lay arum a sobol na gayaga na amin: diad say Manangilaban tayo a Dios!
Say aralem a liket, say nagnap ya liket et naalmo no kuan tayon walad sikatayo la so sakey ya sangkaabigan! No walad dili tayo la so bibirbiren ya mangiter na kapanuan na amin ya kakulangan tayo. Anggapo arum no say Dios a Katawan!
Twa, dakerakel iray bibirbiren tayon kamaungan. Kaabigan diad mundo ya labay tayon nagamuran tan pirawat tayon nakayaryan. Kayamanan, abig na laman, posisyon, anggad say pikakaaro odino falling in love. Saraya et walay anggaan da balet. Maung tan maabig ira, balet, no saraya labat so anapen pian walay andi-anggaan ya liket tan gayaga, ag iraya nepeg. Ta say twa, diad iyaakar na panaon, odino no manasalat iray kipapasen tayo, saraya et naandi tan sikatayo so onsawa. Tan sirin say liket ya walad sikatayo so ag met mabayag. Naandi so kayamanan. Nabalang so inka-ogaw. Ontaken so too. Naandi so kagangana. Nabalang so posisyon. No walay liket ya onsabi ed sikatayo, temporary labat. Ta lapud, temporary so panlalapuan da.
Say pirpirawat tayo ya sikatayo so petepeteg ya nakabat, aroen ya anggapoy condition na sakey et naalmo labat iya ed say Dios a Katawan. Only God can fulfill that desire.
Say kasalanan na too, say kasalanan a tawir so amultot iyan relasyon a pakalmoan na sayan kagnapan a pirpirawat. Balet, nen unaan a Christmas, dwan libo lan taon so apalabas, say Dios so sinmabin mangilaban ed sikatayo.
Tan natan, sisilibraan tayo iyan katwaan: Manliket itayo, mangayaga itayo ta onsabi la so Manangilban. Sayan liket et gayaga ed say Dios a Katawan. No anggapo so Dios ed amin, anggapo so kagnapan na liket tayo. No arawi itayo ed say Manangilaban, naandin amin so pirpirawat tayo. No anggapo itayo ed si Kristo, anto so kakanaan na amin? Mangayaga itayo lapud say Dios a Katawan tayo so wadia la, say sobol na peteg tan twan liket tan gayaga na bilay tayo. Ontan pa komun. Amen.
