“Ta say Dios ag to imbakiy Anak to a manusa, no ag ingen mangilaban, ed sankamundoan.” Anto so kabaliksan na twan panangaro? Anto so true love?
Mabetbet ya say kwan na dakel, say panangaro et sakey ya liknaan ya mangiiter na liket tan ligliwa ed bilay na sakey ya too. Sikato ya kasi so twan panangaro?
Panon balet no bilbilang et abalang la so liknaan? Wala ni kasi so panangaro?
Panon to lamet balet no sayan aro et angiter, aliwan ligliwa tan liket, balet sakit tan kairapan? Wala ni kasi panangaro?
“Ta say Dios ag to imbakiy Anak to a manusa, no ag ingen mangilaban, ed sankamundoan.” Anto so panangaro na Dios ed sikatayo?
Diad gapo gapo, inkuan na Dios ed say too: Wala so sipanan tayo – Siak so Dios yo, tan sikayo so magmaliw kon totook. Tan inter na Dios ya amin so nakaukolan na totoo. Sikara so tinawag na Totoo’y Dios. Tan sikara so inlaban na Dios ed saray kalaban da, inyagel to rad saray manederal ed sikara. Inter na Dios so panangasikaso to ed amin ya kipapasen tan panaon. Naimatonan da yan sipanan di Abraham, Isaac tan Jacob. Anggad sikara di Moises. Kanian diad say unaan a babasaen onya so nangel tayo ya imbaga na Dios: “Siak a Katawan so sakey a Dios a maaro tan mapangasi; aliwa ak a maipapasnuk tan napno ak na baleg a panangaro tan katooran.”
Diad sayan mabonluk ya panangaro na Dios ed totoo to, anto so ebat tan imbilay na totoo. Ilaloan tayo ya lapud nanaimatonan da so inkatoor na Dios ed say sipan to, ontan met so inkatoor na totoo ed say sipanan da: say Dios labat so Dios da. Anggapo la so arum. Balet, amta tayo ya ontan lay panag-kasalanan na too. Tan mabetbet ya bebenegan to so sipanan da ed say Dios a Katawan. Lapud saya, nepeg labat ya dusaen na Dios so totoo to lapud sarayan kasalanan.
Ontan kasi so ginawa na Dios ed too? Say kuay ibanghilyo: Ta say Dios ag to imbakiy Anak to a manusa, no ag ingen mangilaban, ed sankamundoan.”
Siopa so twan panangaro? Say Dios so twan panangaro.
Anggaman sikatayo so makasalanan, inaro itayo na Dios. Imbaki to so Anak to pian ilaban to itayo – aliwan pian dusaen to itayo.
Aliwan liknaan so panangaro sirin. No ingen saya et manangiter na bilay. Saya et ipapanengneng diad gawa tan diad bilay. Say Dios so panangaro. Lapud inararo itayo na Dios, anggan sikatayo so makasalanan, inbaki to so Anak to ya magmaliw a too, pian nipananengneng to no panon so panangaro na Dios. Tan saya so peteg tan matoor tayon oliran iya.
Wala kasi so pansampotan na sayan panangaro na Dios ed say too? Ebat: Anggapo. Say too balet so mabetbet ya naandiaan na panangaro. Kanian, nanaimatonan tayo so onkakayat ya kaugsan. Siblitan. Kolkolan. Kairapan. Kaermenan. Panbokbokor. Bunga irayan amin na kaandian na panangaro.
Ta say panangaro, inkuan nen Pablo et: maanos tan mapangasi; aliwan maimon, o mapasirayew, o mapaatagey; say aro aliwan mabanday so kagagawa to, aliwan masiblet, o maipapasnuk; ag mamopokuk na sakit na linawa. Say aro ag manliliket ed kaogsan, no ag ingen manliliket ed katwaan. Say aro et ag balut onsuko, tan ag balut naandian na pananisia, ilalo, tan anos. (1 Cor 13, 4-6).
Say aro et para say pankamaungan na arum. Say aro et pabpablien to so arum. Say aro et manbonluk. Maiiter. Aliwan masiblet. Say aro et walay mision to: Mission 143-44.
Diad sayan Solimnidad na Santisima Trinidad, saksakey a Dios ed taloran Persona, ibebelyaw tayo no nanlapuan tan say pansampotan tayo. Nanlapo tayod panangaro na Santisima Trinidad; mansampot tayo ed panangaron inter na Katawan a Jesus ed sikatayo, diad bilay na Santisima Trinidad. Ontan la komon. Manaarowan tayo: diad anos tan panangasi.
