Agaylay taken la nen Abraham nen tinawag ya Dios ya sikato so onpikal ed baley to tan onlad pasen ya agto amta no antoy nasabian tod man. Say ilaloan nen Abraham et diad itaken to sikato la so man-retire: manpainawa la, anggapo la so baleg tan ambelat ya gawaen tod bilay. Baet, diad sayan inpan-onor nen Abraham ed say Dios, binirbir to so pakayari na Dios ed amin: say Dios so Dios na amin a pinalsa. Siopa sirin si Abraham ya akoen ton kayaryan to so mundo?
Diad sayan inpan-onor nen Abraham ed Dios, agamoran to so sipan na Dios ed sikato: say bendision na dalin tan agnabilang ya ilalak!
Ontan met so kabaliksan na say Transfiguration nen Jesus. Say transfiguration et sipan na gloria na Dios ed say Anak ton maonor ed say Ama to. Sayan inpan-onor nen Jesus ed say Ama et sikato so angiter na gloria na inkiolid bilay.
Saya met so kekerewen na Dios ed sikatayo ed sarayan panaon na kuaresma: obedience ed say Dios. Say pan-onor ed say Dios. Sayan obedience et bibirbiren to ya say Dios et kayaryan ton amin; tan walad sikatayo labat so panangasikaso na mundo tan amin ya wadia.
Sikatayo labat so manangasikaso na Dios. We are God’s stewards. Tan lapud agtayo kayaryan so mundo, no ingen et inpabayes tan papa-asikaso na Dios irayan amin ed sikatayo, sikatayo so tatawagen ya STEWARDS labat.
Panon tayon nipanengneng iyan panangasikaso ed sarayan kayaryan na Dios? Anto ra so inter na Dios ya asikasoen tayo, anggaman usaren tayo ra?
Say Dios tayo so aliwan masiblet. Amin tayo walay kayaman tayon nanlapud say Dios. Kayamanan ya mabolos ya inter na Dios ed sikatayo ya usaren, asikasoen, pabolaslasen: say Time, Talents tan Treasure.
Unaan, say PANAON. Time. Say panaon et aliwan usaren parad dili labat. Say panaon ya iter ed arum et aliling toy iter tayon kayaman ed arum. No mabolos tayon iter so oras tan panaon tayo ed sakey, panangaron iiter met iman. Ta say twa: agtayo sarag ya aroen so sakey no agtayo itdan na panaon man ya too. No ibaga tayon anggapo so panaon tayo ed sakey ya too, anggan saya et asawa, anak, ateng o kaaro, say kabaliksan to et wala ni so mas importante nen sikara. No agtayo mangiter na oras tan panaon, panon tayon aroen iraya sirin? Agkayo natatakot ya mangiter na panaon ed sarayan totoon importante ed bilay yo. Say panaon ya iter yo, panangaro man ya nipanengneng yo. Daiset odino maganat ya panaon, say kabalikasan to: daiset tan melmelag ya panangaro.
Kumadwa, saray TALENTO tayo. Nanlapud Dios iraya. Nanlapud inkianak odino naaralan tayo ra. Diad sarayan talento tayo: panagluto, panangansion, say maong a panag-salita, say maong ya panag-galaw, panag-tanem, tan arum nira: saraya et iner na Dios aliwan para sikatayo dili. Wala iraya para napanlingkuran iray arum. Anggapo so kakanaan na bosis ya agay lay dakep no anggapo met lamlamang so makakarengel tan say dilim labat so kakansionan mo. Anto so kakanaan ya masamit ya luto no anggapo so mangan? Diad sarayan talento tayo, si Kristo so manga-aro diad panamegley ed sikatayo. Agkayo natatakot ya i-share irayan talento ya nanlapud say Dios para say arum.
Kumatlo, saray KAYAMANAN tayo. Treasure. Lapud say Dios so akan-kayaryan na amin tan nanlapuan na amin ya walad sikatayo, anggapo sikatayo so tatawagen ya exclusive ownership na kayamanan tan say kuarta tayo. Lapud sikatayo so naitdan na panangasikaso na Dios, say Dios sirin so manunaan ed bilay tayo. Aliwan makana tan makabaliksan no say ibabagat tayo ed say Dios et saray kakera-kera. Mabetbet ya say ipawil tayod say Dios et saramay kera-kera tayo: sinsilyo para say Dios; papel para say load. Mikol para say Simbaan, dolyares para say kawes.
Tangay kayod tagey tan nengneng yoy krus: diad sayan krus, inter na Dios ya amin para sikatayo. Anggapo so intilak to! Amin inter na Katawan para sikatayo. Panon tayon nakontento ya mangipawil ed say Dios na saray kera-kera tayo labat? Anto so kabaliksan na sayan bilay ya inbagat na amin na Katawan ed say Ama to para sikatayo? Agkayo natatakot ya mangiter ed arum, tan aliwan kera-kera.
Diad sayan pamirbir tayo ya sarayan Panaon, Talento tan Kayamanan tayo et agtayo ya kayaryan, no ingen pabayes na Dios ed sikatayo, naawat tayo so sipan ya bendision ya agnasabsabaan. Ta say Dios ya nanlapuan na amin et aliwan masiblet ya Dios! Inter tan iter ton amin irayan nakaukolan tayo. Ontan pa komon. Amen.
Based on the Meditation for the Second Sunday of Lent, “Renunciation and Fruitfulness” by Archbishop Socrates B. Villegas, DD, Archbishop of Lingayen-Dagupan
