Lapud pananisia tayo ed say Dios ya mapangasi tan mapangaro, saray pikakasi tayo tan saray dasal tayo et dedengelen na Katawan. Dakerakel so dasal tayo; dakerakel so pikakasi tayo ed say Dios ya sankamakapanyarian. Dakerakel irayan kekerewen tayo ed say Dios. Wala irayan kerew tayon nipaakar ed abig na laman, say aligwas na bilay, say makapangiter na liket tan inawa ed sikatayo, a singa, say isabi na kuarta, odino sakey ya tulong ya nakaukolan tayo. Odino, saray kerew ya maka-pasa ed board exam so anak, odino maka-almolya trabaho so asawa, maka-abroad la pian makalmo met la na panbilay tan siguro met, say gapuoan la na inawa tan maliket ya bilay. Mabetbet met ya sarayan pikakasi tan kerew tayo ed say Dios et iiter na Dios, no ag aliwan tampolan, unong met balet ed say pansiansia tayon manilalo ya nagamuran tayo irayan amin, katekep na say pakasarag tayo tan say kimey tayo.
A singa bilbilang, no kerewen tayon maka-pasa ed board exam so anak, nepeg met ya samay anak yo et manaral tan manreview ya maong. No pikakasi tayo so aliguas na bilay ed say Dios, nepeg met labay ya sikatayo so mankimey, aliwan ngiras-ngiras, manbilay ya kontento, makabaliksan, aliwan maabak tan irresponsible. Diad sarayan pikakasi tayo, kaiba tan katekep so baleg ya pananisia tan panagmatalek ed say Dios a Katawan. Balet, wala ra so dasal tan pikakasi tayo ed say Dios, ya anggapo so nagawaan tayo, no say manmatalek tan manilalo labat ed say Panangasi na Dios.
Onya so kipapasen nen Jairo. Sikato so inmasinger ed si Jesus. Ipipikasi ton samay anak ton bii so onabig la komon ta sikato so mansasakit. Balet, kasumpal to ya akikasi ed si Jesus, sinmabi so balita ed sikato: " Inatey lay anak mo!" Para saray kakaiba nen Jairo, anggapo la so kakanaan na say pikakasi to ed si Jesus. Say kuanda ingen ed sikato: "Akin et aabalaen mo niy Maistro?”
Aminpiga tayo lan kinmerew ed say Katawan, ya amta tayon singa imposible ya iter na Katawan, balet, mansiansian tayo ni ya ontalimokor tan manpikasi ed say Katawan. Balet, angaman antoy pandasal tayo, agtayo agamuran so labay tayo. “Akin et aabalaen mo niy Maistro?” Saya so mabetbet ya walad liknaan tayo.
Ag arawi so experience nen Jairo ed sikatayo. Nanpikasi tayo met ed say Katawan ya onabig so sakey ya inararo tayo, odino onbiskeg so anak o asawa. Balet, imbes ya walay onasabi ya balitan mangibaga:" Manliket ka, inmabig so anak o asawam", say nangel tayo et say makapaermen ya balita: "Inatey lay anak mo".
Balet, agtayo komon nanaekalan na ilalo tan panagmatalek ed say Katawan, anggan anto so nagawa: Manisia tayo,manmatalek tayo ed say Dios angganman singa anggapo la so ilalo tan posibilidad ed bilay tayo. Walay abitla nen Pope Benedict XVI nipaakar ed saya. Say kuanto: "Sikatayo so walad mas mabiskeg ya lima; tan sikatayo so walad lima na panangaro." Tan say sipan na Katawan ed si Jairo tan diad sikatayo so mangiter na ilalo ed amin: "“Ag ka natatakot; pabiskeg moy linawam.” Say panagmatalek tayo ed si Kristo so makaekal na say takot, say ermen, say pakaekal na ilalo. Para say Dios, say imposible ed too, et posible. Manmatelek tayo ed say Katawan, tan amin manontumbok la unong ed say linawa to. Ontan pa komon. Amen.
