Say Cute ya Puso.

Nan pa ECG ak nen Lunes. (Electrocardiogram, sakey ya test ed puso pian nalikas so patok tan kumpas to). Sikato ya so suggestion na doctor ed siak kasumpal ya impasabi ya mansakit so eges ko. Mabetbet. Tan kaibay kesaw tan maningas no ontakayan.

Kuay Ate Per (Dra Jenniffer Ann Mendoza-Wi, kapinsan ko), "Di ba saya so agawad sika nen nan MI ka nen saman?" (MI, acute myocardial infraction, odino atake na cute a puso).

Nen 2017, nan MI ak tan nan-undergo ak na angioplasty. (Pian agko la ipapaliwawa no anto ya, basa yo lay apalabas iran posts ko nen 2017). 

Linma ak ed balon inpalagey ya medical laboratory ed kaabay na simbaan ed Binmaley. Sikaray manaabang ed OVC Building. Agano ak labat ta siak so unaan. Panon to met ey, walking distance. Arap na kumbento labat so kawalaan da. Pigaran kundang labat.

Naani, awiten kod doctor pian basaen toy resulta. Kaiba met lay blood test ko: say pakasyat ed dalak, tan kakapal na taba  tan arum ni ran pakanengnengan no antikey o andukey ni bilay. Haay.