Nen ogaw ak ni, nen siak ni so manaaral ed elementaria, sikami so babangatan na saray katekista ya manlalapud MCS. Sakey ed say assignment mi ed say catechism class et say pangipatlek na "Manisia ak.".
No dasalen so "Manisia ak", nasabi so sakey ya parte ya inkuanto, "manisia ak ed si Jesu Cristo. inpasak ed krus, inatey tan inkotkot. Diad kumatlon agew inmolid bilay, tinmokotok ed tawen, tan manyodyorong ed kawanay ama.." Diad imagination ko nen ogaw ak, say intokotok na Katawan et singa ontotoktok ed puirtay tawen, tan say Ama so wadmad biek a puirta ya lukasan tan palooben toy Anak tod tawen. Say pagak nen saman, "panon to no ag nangel na Ama ey? Kalamor met lay Jesus ya toktok ya toktok ed paway na tawen?"
Sayan simba, sisilibraan tayo so solemnidad na intokokot na Katawan a Jesu Cristo ed tawen. Anto so kabaliksan na sayan bangat tan doktrina na Simbaan?
Say Katawan so pinmawil lad Ama to, tan sikato so managiesel na amin ed say Ama. Anto so ibabaga na Ibanghiyo tayo natan?
Unaan, impanunot na Katawan so mensahe na kilalaban tayo. Unong ed say ibanghilyo nen Juan, say Katawan so linmad mundo pian iabelyaw toy kilalaban tayo diad panamegley na panirap, impatey tan inkioli tod bilay. Ta lapud saya, inter na Katawan so kilalaban tayod kasalanan, tan inlokas tod tawen tan bilay ya andi-anggaan ed amin.
Kumadwa, angiter na kimey tan misyon so Katawan ed saray disipulo to. Tinawag to ran magmaliw a tasi ed sarayan ginawa na Katawan nipaakar ed say kilalaban tayo. Kaiba ra Ispiritu Santo. Ag ira manbokbokor. Sikara so magmaliw ya tasi ed intiron mundo!
Sirin, no tooren tayo so kabaliksan na say Intokotok na Katawan, tooren tayo so misyon tan tawag na Dios ed sikatayo: magmaliw ya tasi to ed mundo. Sikatayo so magmaliw ya salita, lima tan sali, kanunotan tan bilay nen Jesus ed mundo.
Awiten tayo si Jesus. Manbilay a singa si Jesus. Mangaro a singa si Jesus. Manirap a singa si Jesus.
Nabwas, panagboboto tayo. Pankanawnawan iiter ed sikatayo na constitution ya manpili na saray mannlingkur ed sikatay para say pankamaungan na karaklan. Ed sarayan panaon, panon ya awiten tayo si Jesus ed mundo natan? Panon ya sikatayo so mantasi ed say impanirap, impatey tan inkioli na Katawan?
Onya so simbawa na pinabli tayon Arsobispo Socrates B. Villegas: Vote like Jesus! Manpili tayo a singa si Jesus! Panon? Tepeten tayod dili tayo: no botante si Jesus, panon ton piliin iray kandidato to?
No botante si Jesus, pataktakot kasi ed panagboto? No botante si Jesus, ilako to kasi kanepegan ton manpili unong ed konsiensia to? No botante si Jesus, pilien to kasi iray matitila, malalastog, anggapoy kakayahan? Pilien to kasi so kandidaton agto antakot so Dios?
No botante si Jesus, siguradon antes ya onlad presinto, sikato ni so mandasal. Kerewen to so liwawa na Ispiritu Santo.
No botante si Jesus, pilien to so twan tasi na imbangat tan impanbilay to.
Komon, walad sikatayo so kabiskegan a linawa ya tooren tayo so ganggan tan tawag na Dios ya awiten so Katawan ed mundo, ya magmaliw ya twan tasi to. Ontan pa komon. Amen.
